ᒋᔖᔮᒄ ᑳ ᒨᓈᐱᑎᐦᒃ ᐅᔅᑭᓐᐦ

Share Button

ᐁᓪᓰ ᑕᕝ ᐋ ᒌ ᑎᐹᒋᒧᑦ, ᒋᓵᓰᐲ
ᐱᕌᔨᓐ ᐌᑉ ᐋ ᒌ ᐃᑣᔥᑎᒫᑎᐦᒃ ᑭᔮ ᑭᔮ ᐋ ᒌ ᒥᓯᓂᐦᐊᐦᒃ

ᐙᔥᑭᒡ ᐙᔥ ᐊᓂᑖ, ᑖᐹ ᓈᔥᑏᒡ ᓂᐅᐦᒋ ᑖᑆᐦᑖᓐ ᐊᓂᑖ ᒀ ᐋ ᒧᔑᐦᐋᑭᓂᐎᑦ ᐊᐙᓐ, ᐋ ᐊᔨᓈᓂᐎᒡ᙮
ᑖᐹ ᓈᔥᒡ ᓂᐅᐦᒋ ᐃᔮᓐ᙮ ᓂᒥ ᓂᐅᐦᒋ ᐃᔮᐱᑖᔨᐦᑖᓈᒋᒑ ᐊᓐ ᐙᐦᒋ ᐋᑳ ᐅᐦᒋ ᑖᑆᐦᑎᒫᓐ᙮
ᐊᓄᐦᒡ ᒫᒃ ᐐ, ᐄᔮᒄ ᐋ ᐊᑎ ᐃᑖᔨᐦᑎᒫᓐ, ᐊᓐ ᒀ ᐋ ᐊᔨᓈᓂᐎᒡ, ᐊᓂᒌ ᒀ ᔅᐱᕆᑦᔅ, ᑖᑆ ᒀ ᐋ ᐃᔮᒡ ᐅᑎᐦ᙮
ᐊᓂᑖ ᐹᔨᒀᐤ ᐊᓂᑖ, ᑳ ᒌ ᐊᔨᑦ ᒫᓐᐦ ᐊᓂᔮ ᓂᑳᐐ, ᐹᔨᑯᔨᒡ ᐊᓂᑖ ᐋ ᒌ ᐐᒋᔮᐦᒡ, ᒨᔥ ᐋ ᒌ ᒧᔑᐦᐋᒡ ᐊᐙᔨᐤᐦ, ᐊᓂᑦ ᐊᓂᔮᔨᐤ᙮
ᑳ ᒌ ᐃᑖᔨᐦᑎᒫᓐ, ᒑᒀᔨᒋᒑ ᐙᐦᒋ ᐃᐦᑎᒡ, ᑳ ᒌ ᐃᑖᔨᐦᑎᒫᓐ᙮ ᐋᑳ ᒫᒃ ᓂᐦᑖ ᓃᔨ ᓈᔥᑏᒡ ᒑ ᒌ ᐃᔮᔮᓐ᙮
ᐹᔨᒀᐤ ᒫᒃ ᐊᓂᑖ ᐋ ᐊᑎ ᐱᒥᔥᑳᔮᐦᒡ, ᓈᔥᒡ ᐋ ᒥᔻᑭᒥᒡ᙮ ᓈᔥᑏᒡ ᓂᒥ ᔫᑎᓐ᙮
ᑯᔮᑦ ᐊᓂᔮ ᓂᑳᐐ, ᐋᑯᑦ ᒫᒃ ᐅᑎᐦ, ᐊᔨᐤ᙮ ᐋᔑᒄ ᐙᔥ ᐹᐦᑎᐙᑭᓂᐤ ᐊᐙᓐ, ᐊᔨᐤ᙮
ᒀᑎᒃ ᐆ, ᐊᐙᓐ ᐊᓐ, ᓂᑎᑖᐤ᙮
ᑯᔮᑦ ᐆ, ᐊᑳ ᑳ ᐙᐱᐦᑎᐦᒃ᙮
ᒋᔖᐃᔥᒀᔥ ᐊᓂᑖ ᒌ ᓂᐦᐄᐦᑭᐙᑭᓂᐎᔨᒋᒑ ᐊᓂᑦ᙮ ᑮᑆ ᑳ ᐐᐦᐋᑦ ᐊᓂᔮᐦ ᒋᔖᐃᔥᒀᔥᐦ᙮
ᐊᓐ ᒫᒃ ᒋᔖᐃᔥᒀᔥ ᐊᓂᑦ ᑳ ᓂᐦᐄᐦᑭᐙᑭᓂᐎᑦ, ᐊᔨᐤ᙮ ᑳ ᐃᔮᑦ, ᒋᔖᔮᒄ ᑳ ᐲᑯᐱᑎᒧᑯᐱᓈ, ᐊᔨᐤ᙮
ᔖᔥ ᑮᑆ, ᑖᐹ ᓂᒋᔅᒑᔨᒫᐤ ᑖᓐ ᑎᐦᑐ ᐱᐳᓐᐦ ᒀ ᐊᓂᔮᔨᐤ᙮
ᐋᒄ ᐊᓂᐦᐄ ᐅᔅᑭᓐᐦ, ᒥᒄ ᓂᑐᐐ ᒑ ᐊᑎ ᐃᒋᔥᑖᐤᐦ, ᒌ ᐊᔨᐤ᙮
ᐊᓂᑦ ᒫᒃ ᐋ ᐊᑎ ᐱᒥᔥᑳᓂᐎᒡᐦ, ᒌ ᐊᔨᐤ᙮ ᐋᔑᒄ ᑳ ᒌ ᐹᐦᑎᐙᑭᓂᐎᑦ ᐊᐙᓐ᙮
ᒸᐦᒡ ᐊᓂᑖ ᐋ ᐹᒋ ᓈᔑᐹᑖᒋᒧᑦ ᐊᐙᓐ ᑳ ᒌ ᐃᑎᐦᑎᑭᓂᐎᒡ, ᒌ ᐊᔨᐤ᙮
ᐋᔪᐎᒄ ᒫᒃ ᐊᓂᔮᔨᐤ ᑳ ᒌ ᐊᔨᑦ᙮
ᓈᔥᒡ ᐋ ᒌ ᒥᔻᔑᒡ ᐊᓂᑦ ᐋ ᒌ ᐃᐦᑎᑯᓂᑯᐱᓈ ᐊᓐ᙮ ᑮᑆ ᓂᒌ ᐙᐱᐦᑖᓈᒋᒑ᙮
ᑏᐱᑦ ᐙᔥ ᓈᓂᑑ ᒌ ᐃᔮᒋᒑ, ᑳ ᒥᔪᐦᑭᐦᒃ ᐊᓂᔮᔨᐤ᙮ ᒦᓐ ᑳᐤ ᐊᓂᑖ ᑳ ᐄᔑ ᐃᔮᑦ᙮
ᒥᒄ ᓂᑐᐐ ᑳ ᐊᑎ ᐃᒋᔥᑖᔨᒡᐦ ᐊᓂᔮᐦ ᐅᔅᑭᓐᐦ᙮ ᒋᔖᔮᒄᐦ ᐋ ᒌ ᐃᔮᔨᒡᐦ᙮
ᐋᐅᔨᒋᒑ ᒫᒃ ᐊᓂᔮ ᐙᐦᒋ ᒌ ᐃᑎᒥᒋᓱᑎᐦᒡ ᐊᓂᔮᔨᐤ, ᐊᓂᔮᔨᐤ ᑮᑆ ᐊᓂᑦ ᐊᓂᔮ ᐋ ᒌ ᐃᐦᑎᑯᓂᔨᒡ᙮
ᐋᔪᐎᒄ ᐋᒄ ᐊᓂᔮᔨᐤ ᓂᑐᐐ ᐋ ᒌ ᐊᑎ ᐃᒋᔥᑖᔨᒡᐦ ᐊᓂᔮᐦ ᐅᔅᑭᓐᐦ᙮
ᐋᔪᐎᒄ ᒫᒃ ᐊᓂᔮᔨᐤ ᑳ ᐹᐦᑑᒄ ᐊᓂᔮ ᓂᑳᐐ ᐋ ᐊᔨᑦ᙮

Share Button

Comments are closed.