ᒦᒋᒻ ᑳ ᒌ ᑭᓄᐙᔨᐦᑖᑭᓂᐎᒡ

ᒥᕌᔮ ᓯᐱᔨᐤ ᐋ ᒌ ᑎᐹᒋᒧᑦ
ᐱᕌᔨᓐ ᐌᑉ ᐋ ᒌ ᐃᑣᔥᑎᒫᑎᐦᒃ ᑭᔮ ᐋ ᒌ ᒥᓯᓂᐦᐊᐦᒃ

ᐋᐃ ᓂᑭ ᑎᐹᒋᒧᓐ, ᐊᓐ ᒀ ᒦᒋᒻ ᑳ ᐊᑎ ᐃᐦᑐᑖᑭᓂᐎᒡ ᐙᔥᑭᒡ᙮ ᒥᓯᐙ ᑮᑆ ᒑᒀᓐ ᐋ ᒌ ᒥᓈᐦᐅᓈᓂᐎᒡ᙮ ᐋᐅᒄ ᐊᓐ ᒑ ᐐᐦᑎᒫᓐ᙮ ᓈᔥᒡ ᒀ ᐋᔥᒄ ᐋ ᒌ ᐙᔪᑎᓰᑦ ᐱᔮᓯᐤ – ᓂᔅᒃ ᐎᑦ᙮

ᒥᔑᑳᒫᐦᔮᐅᐲᓯᒽᐦ, ᐋᑯᑦ ᐙᔥ ᑳ ᒌ ᐙᔪᑎᓰᑦ ᒀ ᓂᔅᒃ᙮ ᐊᒄ ᐊᓐ ᒫᒃ ᓈᔥᒡ ᒥᔥᑏ ᐋ ᓂᐱᐦᐋᑭᓂᐎᒡ ᓂᔅᑭᒡ, ᐊᔮᐱᒡ ᓈᔥᑏᒡ ᒥᓯᐙ ᒑᒀᓐ ᒌ ᒥᓈᐦᐅᓈᓂᐤ, ᐊᓂᔮ ᐋ ᐃᓯᓈᑯᓯᑦ ᓂᔅᒃ᙮ ᑭᔮ ᐋᑳ ᐅᐦᒋ ᐃᐦᑎᑯᐦᒡ ᐊᓂᑖ ᒑ ᒌ ᒥᔥᑭᐎᑎᐦᑖᑭᓂᐎᒡ ᒑᒀᓐ, ᐋᑳ ᐅᐦᒋ ᐃᐦᑎᑯᐦᒡ᙮ ᐊᔮᐱᒡ ᒫᒃ ᒥᓯᐙ ᒌ ᒥᓈᐦᐆ ᐃᔅᒀᐤ ᐊᓂᔮ ᒑᒀᔨᐤ᙮

ᑖᐹ ᐅᐦᒋ ᐴᓃᐅᒡ ᐃᔅᒀᐅᒡ ᐋ ᒥᔪᐦᑭᐦᒡ ᒦᒋᒥᔨᐤ ᒫᒀᒡ ᐊᓂᔮ ᐋ ᐙᔪᑎᓯᔨᒡᐦ ᐊᓂᔮᐦ ᓂᔅᒃᐦ᙮ ᒦᒋᐙᐦᐱᔑᐦᒡ ᐋ ᐱᒦᐦᑭᐦᒡ᙮ ᐋ ᐹᓯᐦᒡ ᐊᓂᔮ ᒦᒋᒥᔨᐤ, ᐋᐦᒸᔮ ᐋ ᐃᐦᑎᑯᐦᒡ ᐊᓂᑦ ᒑ ᒌ ᒥᔥᑭᐎᑎᐦᑖᑭᓂᐎᒡ᙮ ᑭᔮ ᒀ ᓂᔮᓐ, ᐋᑦ ᔖᔥ ᐋ ᒌ ᐃᐦᑎᑯᐦᒡ ᐊᓐ ᐋ ᒥᔥᑭᐎᑎᐦᑖᑭᓂᐎᒡ ᒑᒀᓐ, ᐊᔮᐱᒡ ᓈᐦᐋᐤ ᑳ ᐃᐦᑐᑎᒫᐦᒡ ᐊᓐ ᒦᒋᒻ, ᒥᓯᐙ ᒑᒀᓐ ᐋ ᒌ ᒥᓈᐦᐅᔮᐦᒡ᙮

ᑭᔮ ᐊᓂᐦᐄ ᐅᐲᐐᐦ, ᑖᐹ ᓂᐅᐦᒋ ᐙᐱᓈᓈᓐ ᓈᔥᑏᒡ ᐊᓂᐦᐄ ᐅᐲᐐᐦ᙮ ᑭᔮ ᐊᓂᐦᐄ ᐃᑖᒥᐦᒡ ᑳ ᒋᑭᒧᐦᒡᐦ, ᒫᔥᑎᓂᐲᐐᐦ ᐋ ᐃᔑᓂᐦᑳᑖᒡᐦ᙮ ᒥᓯᐙ ᐙᔥ ᐊᓐ ᓂᒥᓈᐦᐅᓈᓐ᙮ ᐋᔥᒄ ᒫᒀᒡ ᒀᐦᑎᔮᐦᒡ ᐊᓄᐦᒡ᙮ ᐊᒄ ᐊᓂᐦᐄ ᑭᔮ ᑳ ᒥᔖᒡᐦ ᐅᐲᐐᐦ, ᑎᐹᓐ ᑳ ᐲᑎᐦᐊᒫᐦᒡ, ᑳ ᐃᐦᑐᑎᒫᐦᒡ᙮

ᐊᒄ ᐊᓐ ᒫᒃ ᒦᒋᒻ ᐊᓐ ᒫᒀᒡ ᓈᔥᒡ ᐋ ᐐᔪᐎᒡ ᓂᔅᑭᒡ, ᑳ ᒌ ᐃᐦᑐᑐᐙᑭᓂᐎᒡ ᓂᒫᔥᑖᑯᒡ ᐋ ᐅᔑᐦᐋᑭᓂᐎᒡ᙮ ᓂᔮᓂᑯᑐᓐᐦ, ᒥᒄ ᐊᓐ ᐅᔑᑮ ᑳ ᒌ ᒥᓂᔣᑭᓂᐎᑦ, ᓈᔥᒡ ᒀ ᐋ ᐐᔪᑦ ᓂᔅᒃ, ᐅᑖ ᐋ ᐃᑎᔣᑭᓂᐎᑦ ᐊᓐ ᐅᔑᑮ, ᓂᐱᑭᔅᒋᐦᑯᐦᒡ, ᐱᒦ ᐋ ᐅᔑᐦᑖᑭᓂᐎᒡ᙮ ᓈᔥᒡ ᐋ ᒌ ᐐᒋᔅᑎᒃ ᐊᓐ ᐅᔑᑮ ᐋ ᒧᐙᑭᓂᐎᑦ᙮ ᑖᐹ ᓈᔥᒡ ᐅᐦᒋ ᑑᒥᓯᐤ᙮ ᐋᒄ ᐊᓐ ᐱᒦ, ᑳ ᒥᐦᒑᑭᒥᒡ ᐊᓐ ᐱᒦ᙮

ᑭᔮ ᐊᓂᐦᐄ ᐅᑎᒋᔒᐦ, ᒥᓯᐙ ᓂᒌ ᒥᓈᐦᐅᓈᓐ, ᐋ ᐅᔑᐦᑖᔮᐦᒡ, ᐋ ᒥᓈᐦᐅᔮᐦᒡ ᐊᓐ ᐱᒦ᙮ ᐊᓂᐦᐄ ᐋᑦ ᐋᑳ ᐅᐦᒋ ᐃᔑᓈᑯᐦᒡᐦ ᒑ ᒌ ᒦᒋᓈᓂᐎᒡᐦ ᐋ ᐱᒋᔅᒋᐱᔨᒡᐦ, ᐊᔮᐱᒡ ᐙᔥ ᐊᓐ ᓂᐱᑳᐦᑖᓈᓐ, ᒥᒄ ᐊᓐ ᐱᒦ ᐋ ᐐᐦ ᐅᑎᓂᒫᐦᒡ᙮ ᑎᐹᓐ ᐋ ᐃᐦᑎᑎᑭᓂᐎᒡ ᐊᓐ ᐅᑎᒋᔒᐅᐱᒦ ᐋ ᐃᔑᓂᐦᑳᑖᒡ᙮ ᐋᒄ ᐊᓐ ᑭᔮ ᑎᐹᓐ ᐊᓐ ᐋᐃ, ᐊᓂᔮ ᒀ ᐅᐲᒦᐐᒡ ᐋ ᓰᔂᑭᓂᐎᒡ, ᐊᓐ ᒫᒃ ᐅᔑᑮ ᐋ ᓰᔂᑭᓂᐎᑦ᙮ ᑎᐹᓐ ᑭᔮ ᑳ ᐃᐦᑎᑎᑭᓂᐎᒡ᙮

ᐊᒄ ᐊᓂᔮ ᓂᔅᒃ ᐋ ᐃᓯᓈᑯᓯᑦ, ᐊᓂᔮ ᐅᑖ ᐋ ᐃᑖᐹᑭᒧᔨᒡ ᐊᓂᔮᔨᐤ ᐅᒦᒋᒻ ᐋ ᐃᔅᐱᔨᔨᒡ ᐊᓂᔮ ᐅᑯᒋᔥᒀᔮᐲ, ᐋᐅᑯᓐᐦ ᐊᓂᐦᐄ ᑳ ᒥᓈᐦᐅᔮᐦᒡ, ᐋᑳ ᑮᑆ ᒦᔅᑭᐦᐅᔨᑭᓂᐎᒡᐦ, ᐋᑳ ᐱᑯᓈᔮᒡᐦ᙮ ᑳ ᐲᐦᑐᐱᑎᔑᔮᐦᒡ ᐊᓂᐦᐄ, ᑳ ᐋᐳᑎᓂᒫᐦᒡ, ᑳ ᐴᑖᑎᒫᐦᒡ, ᐋᐅᑯᓐᐦ ᑳ ᐃᑖᐱᒋᐦᑖᔮᐦᒡ, ᑳ ᐹᓯᑭᓂᐎᒡᐦ ᐊᓂᑖ ᑳ ᐊᑯᑖᑭᓂᐎᒡᐦ ᐙᐃᐱᔥᒌᔥ᙮ ᐙᔥ ᐐᐱᒡ ᒌ ᐹᔥᑖᐤᐦ᙮ ᐋᑯᑦ ᑳ ᐲᐦᒋᑭᐎᐦᑖᑭᓂᐎᒡ ᐊᓐ ᐱᒦ, ᐋᑯᑦ ᐊᓂᑦ᙮ ᓈᔥᒡ ᑳ ᒌ ᒥᐦᒑᑣᔥᑯᔑᒡᐦ ᐆ ᐋ ᐃᔑᓈᑯᐦᒡᐦ, ᐋ ᐲᑎᐦᐄᑭᓂᐎᒡᐦ ᐋ ᐊᑎ ᒥᔥᑭᐎᑎᔑᒡᐦ ᐊᓂᑖ ᒀ ᐋ ᐊᔥᑖᑭᓂᐎᒡᐦ᙮ ᑳ ᐃᐦᑐᑎᑭᓂᐎᒡ᙮ ᐋᒄ ᐊᓂᑖ ᐙᐦ ᒦᒋᓈᓂᐎᒡᐦ, ᒥᒄ ᓰᑎᐤ ᑳ ᑭᒑᒥᔑᑭᓂᐎᒡᐦ ᐊᓂᐦᐄ ᐐᐦᒀᔥᐦ᙮ ᑳ ᐃᐦᑐᑎᑭᓂᐎᒡᐦ᙮

ᐋᒄ ᐊᓐ ᒫᒃ ᐱᔮᓯᐤ ᐱᒦ, ᓈᔥᒡ ᒀ ᑯᔨᔅᒄ ᐋ ᒌ ᐐᐦ ᑭᓄᐙᔨᐦᑖᑭᓂᐎᒡ᙮ ᐋᐅᒄ ᐋᒄ ᐊᓐ ᑳ ᐃᑖᐱᑎᐦᒡ ᐊᓐ ᐋ ᒌ ᐹᓯᑭᓂᐎᒡ ᒦᒋᒻ, ᐊᓂᑖ ᒫᒃ ᐙᓯᑭᓂᐎᒡᐦ ᑭᔮ ᐊᓂᑖ ᒫᒀᒡ ᐋ ᐱᐳᐦᒡ, ᐋᐅᒄ ᑳ ᒌ ᒦᒋᓈᓂᐎᒡ᙮ ᐙᓯᑭᓂᐎᒡᐦ ᐊᓂᐦᐄ ᐹᔥᑖᐤ ᒦᒋᒻᐦ, ᐋᐅᒄ ᐋᒄ ᑳ ᐊᔥᑎᐦᑎᑭᓂᐎᒡ ᐊᓐ ᐱᔮᓯᐤ ᐱᒦ᙮ ᑳ ᐃᐦᑐᑎᑭᓂᐎᒡ᙮ ᓈᔥᑖᑆ ᒌ ᐐᐦᑭᓐ ᐊᓐ ᒀ ᐋ ᐄᔑ ᒦᒋᓱᓈᓂᐎᒡ ᑭᔮ ᐋᑳ ᓈᔥᑏᒡ ᒑᒀᓐ ᐅᐦᒋ ᐙᐱᓂᑭᓂᐎᒡ᙮

ᓂᒌ ᐹᓵᓈᓐ ᐙᔥ, ᒥᓯᐙ ᑮᑆ ᐃᔅᒀᐅᒡ ᑳ ᐃᐦᑎᒡ, ᐋ ᐹᓯᒡᐦ ᐊᓂᔮᐦ ᐅᑎᐦᑭᑯᓐᐦ, ᐋ ᒥᓂᔑᐦᒡᐦ ᐊᓂᔮᐦ ᐅᔅᑭᓐᐦ ᐊᓂᔮᐦ ᑳ ᑳᓄᑭᓂᑳᔨᒡᐦ ᐅᔅᑭᓐᐦ, ᐋᐅᑯᓐᐦ ᑳ ᒥᓂᔑᒫᐦᒡ᙮ ᐊᒄ ᓈ ᐋ ᐎᔮᓯᐎᒡ, ᐋᐅᒄ ᑳ ᒋᑭᒧᐦᑖᔮᐦᒡ ᓈᑦ᙮ ᐊᓂᑖ ᐃᔥᑯᑖᐦᒡ ᑳ ᐊᑯᑖᔮᐦᒡ᙮ ᐋᐅᒄ ᐋᒄ ᐊᓐ ᑳ ᑭᓄᐙᔨᐦᑖᑭᓂᐎᒡᐦ ᐊᓂᐦᐄ, ᐹᔥᑖᐤ ᒦᒋᒻ ᒀ ᐋ ᐅᔑᐦᑖᑭᓂᐎᒡ᙮

ᐊᒄ ᐊᓂᐦᐄ ᑭᔮ ᐅᔥᑎᒀᓐᐦ, ᒥᓯᐙ ᑳ ᐃᐦᑐᑎᒫᐦᒡ᙮ ᑳ ᒥᓂᔑᒫᐦᒡ ᐊᓐ ᐅᔥᑎᒀᓐ, ᐊᓐ ᐋᑳ ᒦᒋᒥᐎᒡ᙮ ᐊᓐ ᐅᑯᔨᐤ ᑭᔮ ᐅᑖᐦᐱᔥᑭᓐ, ᐋᐅᒄ ᐋ ᐊᔥᑎᒧᐦᑖᑭᓂᐎᒡ᙮ ᐋᐅᑯᓐᐦ ᐋ ᐊᑯᑖᑭᓂᐎᒡᐦ ᐊᓂᑖ ᐃᔥᑯᑖᐦᒡ᙮ ᓈᔥᒡ ᒀ ᐋ ᐹᐱᐦᒋᑭᐎᒡᐦ᙮ ᐊᔮᐱᒡ ᐙᔥ ᐱᒦᐆᐦ ᐊᓂᐦᐄ ᐋ ᑎᑭᓯᑭᓂᐎᒡᐦ᙮ ᒥᒄ ᓂᒥ ᓈᐅᔥ ᐃᑎᑯᑖᐤ ᐊᓂᑖ ᐃᔥᑯᑖᐦᒡ᙮ ᑖᑭᔥᑖᔨᒡᐦ, ᐋ ᐊᒀᓂᐦᒃ ᐊᐙᓐ᙮ ᐋᒄ ᐊᓐ ᒫᒃ ᐋᐦᒸᔮ ᐅᐦᒋ ᐃᐦᑎᑯᐦᒡ ᐊᓐ ᒑ ᒌ ᒥᔥᑭᐎᑎᐦᑖᑭᓂᐎᒡ, ᐊᒄ ᐊᓂᑖ ᐄᔥᐱᒥᐦᒡ, ᐋᑯᑖ ᑳ ᐊᑯᑖᑭᓂᐎᒡᐦ ᐊᓂᐦᐄ᙮

ᑳ ᐹᓯᑭᓂᐎᒡᐦ ᒋᐦᒋᐙ᙮ ᓈᔥᑏᒡ ᓂᒥ ᐅᐦᒋ ᒌ ᐅᔮᔑᓐᐦ᙮ ᐋᐅᑯᓐᐦ ᐋᒄ ᑳ ᐊᑎ ᑭᓄᐙᔨᐦᑖᑭᓂᐎᒡᐦ᙮ ᑳ ᑎᒥᐦᒋᓂᐦᒃ ᑭᔮ ᐊᓂᑖ ᑎᐹᓐ ᐊᓂᔮᔨᐤ, ᐊᓂᔮᐦ ᐅᒦᒋᒻᐦ ᐃᔅᒀᐤ᙮ ᑳ ᑎᒥᐦᒋᓂᐦᒃ ᐊᓂᑖ ᑎᐹᓐ᙮ ᑎᐹᓐ ᑳ ᐃᐦᑎᑎᐦᒃ ᐊᓂᔮ ᒥᓯᐙ ᒑᒀᔨᐤ, ᑭᔮ ᐊᓂᔮᐦ ᐅᓂᔥᑭᒫᔥᑖᑯᒻᐦ᙮

ᐊᒄ ᐆ ᒫᒃ ᐊᓄᐦᒡ, ᒀᐦᑐᑎᒫᐦᒡ ᒀ ᐋ ᐃᔮᐅᒋᐦᒡᐦ ᓂᔅᒃ, ᓂᒥ ᓂᑎᐦᑐᑖᓈᓐ ᐊᓐ ᒋᐦᒋᐙ ᒑ ᒌ ᐹᓯᒫᐦᒡ᙮ ᒥᒄ ᑖᑭᓯᒫᐦᒡ᙮ ᐋᑦ ᐋᑳ ᑭᔮ ᓈᔥᒡ ᑎᑭᔥᑖᒡ᙮ ᑏᐙᐦᒡ ᐋ ᐊᒀᓂᒫᐦᒡ᙮ ᑏᐙᐦᒡ ᐊᓂᑖ ᐋ ᐃᐦᑎᑎᒫᐦᒡ ᒑ ᒌ ᒥᔥᑭᐎᑎᐦᒡᐦ᙮ ᓈᔥᑏᒡ ᓂᒥ ᒌ ᐅᔮᔑᓐᐦ᙮

ᑭᔮ ᐊᓂᐦᐄ ᐅᑎᓰᐦ ᐋ ᐃᔑᓂᐦᑳᑖᒡᐦ᙮ ᓈᐦᐋᐤ ᒀᐦᑐᑎᒫᐦᒡ ᑭᔮ ᐋ ᑭᒋᓍᐹᑎᔑᒫᐦᒡ᙮ ᐋ ᐊᑯᑖᔮᐦᒡ ᐊᓂᑖ ᐃᔥᑯᑖᐦᒡ᙮ ᓂᒧᔨ ᓈᐅᔥ ᓂᑎᑎᑯᑖᓈᓐ᙮ ᑏᐙᐦᒡ ᐋ ᐊᑎ ᑎᑭᔥᑖᒡᐦ, ᑏᐙᐦᒡ ᐋ ᐊᑎ ᐊᒀᓂᒫᐦᒡ᙮ ᒥᒄ ᓰᑎᐤ ᐋ ᐊᔥᑖᔮᐦᒡ ᐊᓂᑖ᙮ ᐋ ᐊᑎ ᑎᐦᑳᒡᐦ ᒫᒃ, ᐋᒄ ᐋ ᐃᐦᑎᑎᒫᐦᒡ ᐊᓂᑖ ᒀ ᐙᐦ ᐃᐦᑎᑎᒫᐦᒡ ᐋ ᐐᐦ ᒥᔥᑭᐎᑎᐦᑖᔮᐦᒡ᙮

ᒀᐦᑐᑎᒫᐦᒡ ᐊᓐ ᐱᔮᓯᐤ ᒦᒋᒻ ᐋ ᐐᐦ ᑭᓄᐙᔨᐦᑎᒫᐦᒡ᙮ ᒥᓯᐙ ᒀ ᓈᑖ ᐋ ᐃᑎᔑᔮᐦᒡ ᒀᐦᑐᑎᒫᐦᒡ᙮ ᓈᔥᑏᒡ ᓂᒥ ᓂᑐᐙᔨᐦᑖᑯᓐ ᒑᒀᓐ ᒑ ᐙᐱᓂᑭᓂᐎᒡ ᐊᓂᔮ ᐋ ᐃᓯᓈᑯᓯᑦ ᐊᓐ ᓂᔅᒃ᙮ ᑖᐹ ᓂᐅᐦᒋ ᓂᑐᐙᔨᒥᑯᐎᓈᓐ ᓂᑐᐐ ᒑ ᐃᐦᑐᑎᒫᐦᒡ᙮

ᐊᓐᐦ ᒫᒃ ᐅᐲᐐᐦ ᓂᒥᓈᐦᐅᓈᓐ ᑳ ᐊᔨᔮᓐ, ᐊᓂᐦᐄ ᐃᑖᒥᐦᒡ ᑳ ᐃᐦᑎᑯᐦᒡᐦ, ᐋᐅᑯᓐᐦ ᐙᐳᔮᓐᐦ ᐋ ᐅᔑᐦᑖᑭᓂᐎᒡᐦ᙮ ᓈᔥᑖᑆ ᒌᔓᐙᐤ ᐙᐳᔮᓐ ᐋ ᐅᔑᐦᑖᑭᓂᐎᒡ᙮ ᐋᒄ ᐊᓂᐦᐄ ᑳ ᒌ ᒋᔥᑎᔑᐦᐊᒫᐦᒡ ᒫᓐᐦ ᐊᓂᐦᐄ ᑳ ᒥᔖᒡᐦ ᐅᐲᐐᐦ᙮ ᐊᓂᑖ ᐋ ᐃᑎᔑᐦᐄᑭᓂᐎᒡᐦ ᐋ ᐊᑖᐙᒑᓂᐎᒡ ᐅᐲᐐᐦ᙮ ᐊᓄᐦᒡ ᒫᒃ, ᑖᐹ ᒀ ᒌ ᐃᐦᑐᑎᑭᓂᐤᐦ᙮ ᐊᔮᐱᒡ ᐋ ᐋᐱᒋᐦᑖᑦ ᐋ ᐙᐦ ᐋᐱᒋᐦᑖᑦ ᐊᓂᔮᔨᐤᐦ᙮ ᓈᔥᑖᑆ ᐙᔥ ᒥᔻᐤ ᐊᔥᐱᔑᒧᓐ ᐋ ᐅᔑᐦᑖᑭᓂᐎᒡ᙮ ᒸᐦᒡ ᒀ ᐊᓐ ᐙᐳᔮᓐ ᐋ ᐃᔑᒀᑎᓂᐎᒡ, ᐅᐲᐐᐦ ᐋ ᐐᐦ ᐲᑎᐦᐄᑭᓂᐎᒡᐦ᙮ ᒀᔑᓈᑯᐦᑖᑭᓂᐎᒡ᙮ ᐋᐅᑯᓐᐦ ᐙᔥ ᑳ ᒌ ᐅᑎᔥᐱᔑᒧᔮᐦᒡ ᐙᔥᑭᒡ, ᐋᐅᑯᓐᐦ ᐊᓂᐦᐄ᙮

ᐅᐲᐐᐦ ᐋ ᐲᑎᐦᐄᑭᓂᐎᒡᐦ ᐊᓂᑖ᙮ ᐱᒋᐎᔮᓐ ᒀ ᐊᓐ ᐋ ᑭᔅᒋᒀᑎᑭᓂᐎᒡ, ᐋ ᐲᑎᐦᐄᑭᓂᐎᒡᐦ ᐊᓂᐦᐄ ᐅᐲᐐᐦ᙮ ᐋᐅᑯᓐᐦ ᐙᔥ ᑳ ᐅᑎᔥᐱᔑᒧᓂᓈᓂᐎᒡᐦ᙮ ᐊᒄ ᐊᓂᐦᐄ ᐃᑖᒥᐦᒡ ᑳ ᐃᐦᑎᑯᐦᒡ, ᐋᐅᑯᓐᐦ ᑳ ᐅᐙᐳᔮᓂᓈᓂᐎᒡᐦ᙮ ᐋ ᐅᐙᐳᔮᓂᓈᓂᐎᒡᐦ, ᐋᔥᒄ ᑮᑆ ᒫᒀᒡ᙮ ᓈᔥᑏᒡ ᓂᒥ ᒑᒀᓐ ᐃᔮᑭᓂᐤ᙮ ᒥᒄ ᐊᓂᒌ ᒦᑯᓂᒡ᙮ ᐋᔪᐎᑯᓐᐦ ᒥᒄ ᓂᒥ ᓂᒌ ᒥᓈᐦᐅᓈᓐ ᒀ᙮

ᒥᓯᐙ ᓈᔥᑏᒡ ᒑᒀᓐ ᐋ ᒥᓈᐦᐅᔮᐦᒡ ᐊᓂᑖ ᐋ ᐊᑎ ᐃᓯᓈᑯᓯᑦ ᓂᔅᒃ᙮ ᐊᓂᐦᐄ ᑭᔮ ᐅᓯᑦᐦ, ᐊᓐ ᒀ ᐋᔥᒄ ᐋ ᒌ ᐹᓯᑭᓂᐎᒡ ᐊᓐ ᒦᒋᒻ, ᐊᓂᐦᐄ ᒀ ᐅᓯᑦᐦ, ᒥᒄ ᑳ ᒌ ᐹᐦᐹᑯᒋᔑᒫᐦᒡ ᐊᓂᐦᐄ ᒀ ᐋ ᐃᔑᓈᑯᓂᔨᒡ ᐅᓯᑦ ᐊᓐ ᓂᔅᒃ᙮ ᐱᑎᒫ ᒀ ᒑᓯᔮᐹᐅᑖᑭᓂᐎᒡᐦ᙮ ᒥᒄ ᐱᔮᐦᐹᑯᒋᔑᒫᐦᒡ, ᐋ ᐊᑯᑖᔮᐦᒡ ᐊᓂᑖ ᐲᔖᑭᓈᐲᐦᒡ ᒑᑭᒧᐦᑖᔮᐦᒡ᙮ ᐊᓂᑖ ᐋ ᐊᑯᑖᑭᓂᐎᒡᐦ ᒦᒋᐙᐦᐱᔑᐦᒡ᙮ ᐋ ᐊᑎ ᐹᔥᑖᔑᒡᐦ᙮ ᐋᐅᑯᓐᐦ ᐋᒄ ᒦᓐ ᐹᑳᐦᑖᑭᓂᐎᒡᐦ ᐊᓂᑖ, ᐊᐅᔥᑖᒋᐎᓵᐙᓐᐦ ᐋ ᐱᑳᐦᑖᑦ ᐊᐙᓐ᙮

ᐋᐅᒄ ᐊᓐ ᐋ ᐊᑎ ᐃᐦᑐᑑᒋᐦᑦ ᐊᓐ ᓂᔅᒃ᙮ ᐊᓐ ᒫᒃ ᐋᔥᒄ ᓈᔥᒡ ᐋ ᒌ ᐙᔪᑎᓰᑦ ᓂᔅᒃ, ᓈᔥᑖᑆ ᐙᔥ ᒀ ᑳ ᒥᔻᔨᐦᑖᑯᐦᒡ, ᐋᐅᒄ ᐊᓐ ᐋ ᐃᑖᐱᑎᓰᓈᓂᐎᒡ, ᐋ ᒫᐅᒋᐦᑖᑭᓂᐎᒡ ᒦᒋᒻ᙮ ᐋᐅᒄ ᐊᓐ ᒑ ᐃᔥᐱᔑ ᑎᐹᒋᒥᒃ ᐊᓐ ᓂᔅᒃ᙮

ᐊᒄ ᐊᓐ ᒫᒃ ᒥᓯᐙ ᐋ ᐊᑎ ᐃᔑᓈᑯᐦᒡ ᒑᒀᓐ, ᑭᔮ ᐊᓂᒡ ᔒᔒᐱᒡ᙮ ᐊᔮᐱᒡ ᑳ ᐃᐦᑐᑑᒋᐦᒡ ᐊᓂᔮᔨᐤ᙮ ᐊᓂᑖ ᐃᔥᑯᑖᐦᒡ ᐋ ᑎᑭᓱᒋᐦᒡ᙮ ᐋᑳ ᒀ ᒥᓯᐙ ᑏᐙᐦᒡ ᒌ ᒧᐙᑭᓂᐎᒡ᙮ ᐊᔮᐱᒡ ᐋ ᐅᔑᐦᑖᑭᓂᐎᒡᐦ ᐊᓂᐦᐄ ᐹᔥᑖᐤ ᒦᒋᒻᐦ᙮ ᒥᒄ ᐋ ᒋᓍᐹᑎᔣᑭᓂᐎᑦ ᐊᓐ ᔒᔒᑉ᙮ ᐋ ᐊᑯᑖᑭᓂᐎᒡ ᐊᓂᑖ ᐃᔥᑯᑖᐦᒡ᙮ ᒀᔑᓈᑯᐦᐙᑭᓂᐎᑦ᙮ ᐋᐅᒄ ᐊᓐ ᐋ ᐃᐦᑐᑖᑭᓂᐎᒡ ᐊᓐ ᒦᒋᒻ᙮

ᒫᒃ ᐊᓐ ᐐ ᓂᒫᔅ, ᓈᐦᐋᐤ ᑭᔮ ᑳ ᐃᐦᑎᓈᓂᐎᒡ ᐊᓐ ᓂᒫᔅ ᐊᓂᑖ ᒀ ᑳ ᓰᑯᓂᐦᑖᔮᐦᒡ ᐊᓂᑖ ᓅᐦᒋᒦᐦᒡ᙮ ᐋ ᒫᐅᒋᐦᐋᑦ ᐊᐙᓐ ᓂᒫᔅ᙮ ᐊᔮᐱᒡ ᓈᐦᐋᐤ ᑳ ᐃᐦᑐᑐᐙᑦ ᐊᓂᔮᔨᐤ, ᒋᐦᒋᐙ ᒀ ᓈᔥᑏᒡ ᐋ ᐹᔂᑦ᙮ ᐊᓂᒌ ᐙᔥ ᓂᒫᐲᒡ, ᐋᐅᑯᓂᒡ ᐙᔥ ᓈᔥᒡ ᑳ ᒥᔪᓯᒡ ᐊᓂᔮ ᐋ ᐃᐦᑐᑐᐙᑭᓂᐎᒡ᙮ ᐊᔪᐦᐄᑭᓂᒡ ᐋ ᐅᔑᐦᐋᑭᓂᐎᒡ᙮ ᓃᔥᑎᒻ ᒀ ᐊᓂᑖ ᐃᔥᑯᑖᐦᒡ ᐋ ᐊᑯᑖᑭᓂᐎᒡ᙮ ᐊᓂᑖ ᒦᓐ ᐄᔥᐱᒥᐦᒡ ᐋ ᐊᑎ ᐊᑯᑖᑭᓂᐎᒡ᙮

ᐋ ᐊᑎ ᑳᔅᐱᓱᑣᐤᐦ ᒫᒃ, ᐄᔮᒄ ᓈᐦᑎᓈᑭᓂᐎᒡ᙮ ᐄᔮᒄ ᐹᐦᒋᔥᑭᐦᐙᑭᓂᐎᒡ᙮ ᐋᑦ ᐋᑳ ᒀ ᒌ ᐱᒋᔥᑭᐦᐙᑭᓂᐎᒡ᙮ ᐹᑎᔥ ᐊᓂᑖ ᐄᔮᒄ ᐹᑎᒫ ᑳ ᐃᐦᑐᑐᐙᑦ ᐊᐙᓐ᙮ ᒌ ᐃᐦᑎᑯᓐ ᐙᔥ ᐊᓐ ᒑᒀᓐ ᐋ ᐋᐱᒋᐦᑖᑭᓂᐎᒡ᙮ ᐊᓯᓃ ᐋ ᒥᔻᐱᔥᑳᔑᒡ, ᐋ ᐙᐎᔮᔮᐱᔥᑳᔑᒡ᙮ ᓈᔥᒡ ᐋ ᔓᔓᐙᐱᔥᑳᔑᒡ᙮ ᐋᐅᒄ ᐙᔥ ᑳ ᐋᐱᒋᐦᑖᑭᓂᐎᒡ᙮ ᑭᔮ ᐊᓐ ᑳ ᐅᑖᒥᐦᐄᑳᒑᓂᐎᒡ, ᐊᔮᐱᒡ ᐙᔥ ᐊᓯᓃ ᒌ ᐋᐱᑎᓐ ᐋ ᒌ ᐅᔑᐦᑖᑭᓂᐎᒡ᙮ ᓈᔥᒡ ᒀ ᐋ ᒌ ᒥᔻᔑᒡ᙮ ᐋᐅᒄ ᑳ ᐃᑖᐱᒋᐦᑖᑭᓂᐎᒡ, ᐋ ᐅᔑᐦᐋᑦ ᐊᓂᔮᐦ ᐅᔪᐦᐄᑭᓂᒻᐦ ᐊᐙᓐ᙮

ᑭᔮ ᒫᒃ ᐊᑎᒧᒡ ᐋᔥᒄ ᐋ ᒌ ᐋᐱᒋᐦᐋᑭᓂᐎᒡ, ᐐᐙᐤ ᐙᔥ ᑭᔮ ᑎᐹᓐ ᒌ ᒫᐅᒋᐦᑐᐙᑭᓂᐎᐎᒡ ᐊᓂᔮᔨᐤ ᒀ ᒑ ᐅᐦᒋ ᔑᒫᑭᓂᐎᒡ ᓃᐱᓂᔨᒑ᙮ ᐊᔮᐱᒡ ᑳ ᐃᐦᑐᑐᐙᑭᓂᐎᔨᒡᐦ ᐊᓂᔮᐦ ᓂᒫᔅᐦ ᐋ ᐹᔂᑭᓂᐎᔨᒡᐦ᙮ ᑎᐹᓐ ᑳ ᐃᐦᑎᔮᑭᓂᐎᒡ᙮ ᐊᑎᒽ ᐊᔪᐦᐄᑭᓂᒡ ᑳ ᐃᔑᓂᐦᑳᑖᑭᓂᐎᒡ᙮

ᑭᔮ ᐊᓂᐦᐄ ᐅᔥᑎᒀᓂᔥᐦ, ᐊᓂᔮᐦ ᓂᒫᔅ ᐅᔥᑎᒀᓐᐦ, ᑳ ᒌ ᒌᔥᑎᐦᐄᑭᓂᐎᒡᐦ ᐊᓂᑖ ᐃᔥᑯᑖᐦᒡ᙮ ᐊᔮᐱᒡ ᓈᐦᐋᐤ ᑳ ᐃᐦᑐᑎᑭᓂᐎᒡ ᐋ ᐹᓯᑭᓂᐎᒡᐦ᙮ ᐋᐅᑯᓐᐦ ᐋᒄ ᑳ ᐊᑎ ᐊᔅᑎᓯᓂᑖᑭᓂᐎᒡᐦ ᐊᓂᑦ ᐊᓂᔮ ᐊᑎᒧᒡ ᒑ ᒦᒋᒡ᙮ ᐊᔮᐱᒡ ᒫᒃ ᑳ ᐃᐦᑐᑎᑭᓂᐎᔨᒡ᙮ ᒨᔥ ᐙᔥ ᒌ ᐱᒥᓄᐎᑖᑭᓂᐎᐎᒡ ᐊᑎᒧᒡ᙮ ᐊᔮᐱᒡ ᑳ ᐃᐦᑐᑎᑭᓂᐎᒡ ᐊᓐ ᒀ ᐋ ᐱᒥᓄᐎᑖᑭᓂᐎᒡ ᐊᑎᒧᒡ, ᐋᔪᐎᑯᓐᐦ ᐋ ᐱᑭᔥᑎᐦᐙᐙᑭᓂᐎᔨᒡᐦ ᐊᓂᔮᐦ ᓂᒫᔅᐦ ᐋ ᒌ ᐹᔂᑭᓂᐎᔨᒡᐦ᙮ ᒫᒀᒡ ᐊᓂᑖ ᐋ ᓃᐱᐦᒡ ᑳ ᒌ ᐃᐦᑎᓈᓂᐎᒡ, ᓂᒫᔅ ᐋ ᑎᑭᔂᑭᓂᐎᒡ᙮ ᐋ ᑎᑭᔂᑭᓂᐎᔨᒡᐦ ᒀ ᐊᓂᔮᔨᐤᐦ, ᐅᑖ ᒀ ᐋ ᐃᐦᑖᓂᐎᒡ ᒫᒀᒡ᙮ ᐊᓂᑖ ᒫᒃ ᐐ ᓂᑐᐐ ᐋ ᐃᐦᑖᓂᐎᒡ, ᒥᒄ ᑳ ᒌ ᐄᔑ ᔑᒫᑭᓂᐎᒡ ᐊᓂᔮᔨᐤ, ᐊᓂᑖ ᑳ ᓈᑎᐦᐄᐹᓂᐎᔨᒡᐦ᙮

ᐊᔮᐱᒡ ᑳ ᐃᐦᑐᑐᐙᑭᓂᐎᑦ ᐊᓐ ᓂᒫᔅ, ᓈᔥᒡ ᒀ ᒥᒋᓐ ᐋ ᒥᓈᐦᐅᓈᓂᐎᒡ ᐊᓂᔮ ᐋ ᐊᑎ ᐃᓯᓈᑯᓯᑦ᙮ ᐋ ᒌ ᐹᓯᑭᓂᐎᒡ ᐊᓐ ᒑᒀᓐ᙮ ᐊᑎᒧᒡ ᑭᔮ ᐋ ᒌ ᒫᐅᒋᐦᑐᐙᑭᓂᐎᒡ᙮ ᑭᔮ ᐊᓂᒌ ᓂᒫᔥᑖᑯᒡ ᐋ ᐅᔑᐦᐋᑭᓂᐎᒡ᙮ ᑳ ᐃᐦᑐᑐᐙᑭᓂᐎᒡ ᐊᓂᔮᔨᐤ ᒀ ᒋᐦᒋᐙ ᐋ ᐐᐦ ᐹᔂᑭᓂᐎᒡ᙮ ᐊᓄᐦᒡ ᒫᒃ, ᑖᐹ ᒀ ᐃᐦᑐᑐᐙᑭᓂᐎᐎᒡ ᐊᓄᐦᒡ, ᐋ ᐃᐦᑎᑯᐦᒡ ᐊᓂᑖ ᒑ ᒌ ᐲᑎᐦᐙᑭᓂᐎᒡ᙮ ᓂᒥ ᓈᔥᒡ ᓲᐦᒃ ᐹᔂᑭᓂᐎᐎᒡ᙮ ᒦᔥᑯᒡ ᐋ ᔪᔥᑎᔒᔑᒡ ᐙᐦ ᒧᐙᑭᓂᐎᑣᐤᐦ᙮ ᐋᑯᑖ ᑭᔮ ᐋ ᐃᐦᑐᑐᐙᑭᓂᐎᑦ ᑭᔮ ᐊᓐ ᓂᒫᔅ᙮