ᑳ ᐙᐹᐦᐆᑯᓈᓂᐎᒡ
ᓯᐱᔨᐤ ᐋ ᒌ ᑎᐹᒋᒧᑦ, ᒋᓵᓰᐲ
ᐱᕌᔨᓐ ᐌᑉ ᑳ ᒥᓯᓂᐦᐊᐦᒃ ᑭᔮ ᑳ ᐃᑣᔥᑎᒫᑎᐦᒃ
ᐹᔨᒀᐤ ᓅᐦᑖᐐ ᒌ ᐐᒋᐦᐄᐙᐤ ᐋ ᐙᐹᐦᐆᑯᓈᓂᐎᔨᒡ᙮ ᐋᐅᒄ ᑳ ᒫᒥᔅᑳᑖᔨᐦᑎᒫᓐ ᐊᓐ, ᐊᓐ ᑎᐹᒋᒧᐎᓐ ᐊᓂᔮ ᑳ ᐃᐦᑎᒡ ᐊᓂᔮ᙮ ᔖᔥ-ᐋ? ᐋᐅᒄ ᒑ ᑎᐹᒋᒧᔮᓐ᙮
ᐊᓂᑖ ᐋ ᐃᐦᑖᔮᐦᒡ ᐊᓂᑖ ᒫᓂᐦᐄᑯᔅᑳᑭᒦᐦᒡ᙮ ᑳᑭᔮ ᒑᒃ ᐊᓂᑖ ᐋ ᐃᔅᐱᔨᒡ ᐊᔨᔥᒌᒫᐅᐤᐦ ᐋ ᐃᐦᑖᔨᒡᐦ᙮ ᐙᑎᐦᑖᒡ ᐊᓂᔮᐦ ᐊᔨᔥᒌᒫᐤᐦ᙮ ᑳ ᐙᐱᑯᐦᐅᔑᑦ ᑳ ᐃᑖᑭᓂᐎᑦ, ᐋᔪᐎᒄ ᐙᑎᐦᑖᒡ ᑳᑭᔮ᙮ ᒌ ᓂᔥᑏᒑᓂᒌ ᐊᓂᔮ ᑳ ᐃᔅᐱᔨᒡ᙮ ᒀᑎᑯᒡ ᑳᑭᔮ, ᒑ ᓂᑑᐙᐦᒋᒀᔨᐦᒄ ᐃᑎᑰᒡ ᑳᑭᔮ᙮
ᐅᔮ ᒫᒃ ᒋᔮᒋᔖᐹᔮᔨᒡ, ᔫᑎᓂᔨᒋᒑ ᑮᑆ ᐊᓂᔮ᙮ ᒑᐦᒋᐱᔨᒡ ᑳᑭᔮ᙮ ᐙᑎᐦᑎᐦᒡ ᒫᒃ ᐊᓂᔮ ᓂᐲᔨᐤ ᐊᓂᑖ ᐋ ᐃᐦᑎᑯᓂᔨᒡ᙮ ᓈᓈᒥᒌᒻ ᐊᑎ ᔫᑎᓐ ᔨᐤ᙮ ᒑᒃ ᒑᔅᒑᔨᐦᑎᐦᒡ ᑳᑭᔮ ᐎᔮᐹᐦᐆᑯᒡ᙮
ᐅᑖ ᑮᑆ ᐙᐦᔨᐤ ᐙᐦ ᐄᔑ ᐱᑯᐦᐅᒡ᙮ ᒑᐦᒋᐱᔨᔮᐦᒡ ᔨᐤ᙮ ᐅᑖ ᑮᑆ ᓈᑎᑳᒻ ᐄᑖᐦᒑ, ᐋᑯᑖ ᐹᑯᐱᔨᑦ ᒥᔅᑯᒦ ᔨᐤ᙮ ᒑᒃ ᑮᑆ ᐙᑎᑎᐦᐊᒫᐦᒡ ᓂᐲ ᐋ ᐃᐦᑎᑯᐦᒡ ᔨᐤ᙮ ᐋᔥᒄ ᓅᑯᓯᐤ ᒥᔅᑯᒦ ᐊᓈᑦ ᐊᑳᒥᐦᒡ ᔨᐤ᙮ ᒸᔖᐅᐦᐊᒫᐦᒡ ᑮᑆ᙮
ᐊᓂᔮᐦ ᐅᑯᓯᓯᔨᐤᐦ ᐊᓂᔮᐦ ᑳ ᐐᒑᐙᒡ ᐊᔨᔥᒌᒫᐤᐦ, ᐋᐅᑯᓂᒡ ᒑᔅᑭᒧᐦᔮᑭᓂᐎᒡ ᓃᔥᑎᒻ ᔨᐤ᙮ ᐊᑎᒧᒡ ᒫᒃ ᓂᔥᑐ ᔨᐤ᙮ ᓂᔥᑐ ᒥᒄ ᒋᔅᑭᒧᐦᔮᑭᓂᐎᐎᒡ ᐊᑎᒧᒡ᙮ ᐹᔨᒄ ᐊᓂᔮᐦ ᓂᑖᒥᓈᓐᐦ ᔨᐤ᙮ ᐋᔥᒄ ᒌ ᐊᒋᒨᔑᔒᐤ᙮ ᐋᐅᑯᓂᒡ ᒑᔅᑭᒧᐦᔮᑭᓂᐎᒡ᙮ ᒦᓐ ᑳ ᒧᔖᐅᐦᐊᒫᐦᒡ ᔨᐤ, ᔖᔥ ᓂᒥ ᓅᑯᓯᐤ ᒥᔅᑯᒦ ᔨᐤ᙮ ᐊᔮᐱᒡ ᑮᑆ ᐊᓂᑖ ᐋ ᐃᔥᒋᒫᔮᐦᒡ᙮ ᒑᒃ ᒦᓐ ᐙᑎᑎᐦᐅᒋᐦᒡ ᔨᐤ᙮
ᐋᒄ ᐊᓂᒌ ᓂᑖᒥᓈᓂᒡ, ᓈᔥᑏᒡ ᒥᓯᐙ ᓂᒥ ᐱᒫᔨᒫᑭᓂᐎᐎᒡ ᔨᐤ᙮ ᒦᓐ ᐙᐦ ᐹᒋ ᒧᔖᐅᐦᐊᒫᐦᒡ ᔨᐤ᙮ ᐙᐦ ᐴᓯᐦᐋᑦ ᐅᑖᐹᓈᔅᒄᐦ ᔨᐤ ᐊᓂᔮᐦ ᐊᔨᔥᒌᒫᐤᐦ᙮ ᓈᔥᒡ ᐋ ᐃᔅᐱᔨᒡ ᓂᑑᑎᓈᓐ ᐋ ᒀᐦᒀᑎᐱᐱᔨᒡ᙮ ᑯᔮᑦ ᐃᑖᐤ, ᑖᐹ ᑭᑎ ᒌ ᐃᐦᑎᐤ ᔨᐤ ᐃᑖᐤ᙮ ᐱᑭᔥᑎᐙᐦᐙᐦᒄ ᔨᐤ ᐃᑖᐤ᙮ ᐱᑭᔥᑎᐙᐦᐙᒡ ᑳᑭᔮ᙮
ᐋᔪᐎᒄ ᒫᒃ ᑳᑭᔮ, ᓈᐅᔥ ᑮᑆ ᐹᒥᔥᑳᔮᐦᒡ ᔨᐤ᙮ ᓈᔥᒡ ᐋ ᔫᑎᐦᒡ ᑮᑆ ᔨᐤ᙮ ᓈᐅᔥ ᑮᑆ ᐹᒥᔥᑳᔮᐦᒡ ᔨᐤ᙮ ᒑᒃ ᐙᑎᑎᐦᐆᒋᐦᑦ ᒥᔅᑯᒦ ᔨᐤ᙮ ᓂᒥᔮᐅᑦ ᑮᑆ ᒫᔑᑳᒫᐦᐊᒫᐦᒡ ᔨᐤ, ᐊᓂᑦ ᐋ ᒌ ᐅᐦᒋ ᐹᒋ ᒧᔖᐅᐦᐊᒫᐦᒡ᙮ ᐋᐅᒄ ᑮᑆ ᐋ ᐊᑎ ᐊᒀᓯᐱᑎᒫᐦᒡ ᓂᑑᑎᓈᓐ ᔨᐤ᙮ ᓂᒥ ᐃᐦᑖᐅᒡ ᐅᔮᐦᑳ᙮ ᓂᒥ ᓂᐙᐱᒫᓈᓂᒡ ᐅᔮᐦᑳ, ᐅᒌ ᑳ ᒋᔅᑭᒧᐦᔮᑭᓂᐎᒡ ᔨᐤ᙮
ᐊᒄ ᐊᓐ ᒋᔖᔨᔨᐤ, ᒌᒫᓂᑰᒃ ᒋᔖᔨᔨᐤ (ᒞᕐᒡ ᓯᓅᑆᐃ), ᐋᐅᔨᒋᒑ ᑳ ᐃᐦᑖᑦ᙮ ᒑᐦᒋᐱᐦᑖᔮᓐ ᔨᐤ᙮ ᓂᔮᓂᑐᐙᐱᒥᒀᐤ ᔨᐤ᙮ ᑖᐹ ᓂᐎᓈᔨᒫᐅᒡ ᑖᓂᑖ ᐄᑖᐦᒑ ᒑ ᐃᐦᑖᒡ ᔨᐤ, ᐊᓂᑖ ᐋ ᐃᔅᐱᔨᑦ ᒥᔅᑯᒦ ᔨᐤ᙮ ᒑᒃ ᐊᓂᑖ ᓂᔮᓂᑐᐦᑑᒀᐤ ᔨᐤ᙮ ᑎᔮᑆᔮᓐ ᒫᓐᐦ ᔨᐤ᙮
ᒑᒃ ᐱᔮᐦᑑᒄ ᐊᐙᓐ ᔨᐤ᙮ ᒧᔮᒻ ᐋ ᒫᑐᑦ ᒫᓐᐦ ᒀᑎᐦᑎᒫᓐ ᔨᐤ᙮ ᑎᔮᑆᔮᓐ ᒫᓐᐦ ᔨᐤ᙮ ᐊᓂᑖ ᐋ ᐃᔅᐱᐦᑖᔮᓐ ᐊᓂᑖ ᐋ ᐃᓯᐦᑑᒄ ᔨᐤ᙮ ᐋᔪᐎᒄ ᒫᒃ, ᒑᒃ ᐎᔮᐱᒥᒀᐤ ᔨᐤ᙮ ᐙᑎᐦᑎᒀᐤ ᔨᐤ᙮ ᐋᐅᑯᓂᒡ ᐅᒌ ᑳ ᒫᑐᒡ ᐊᓂᔮᐦ ᐊᔨᔥᒌᒫᔥᐦ᙮
ᒀᑎᒀᐤ ᔨᐤ, ᔖᔥ ᓂᒥᔑᑳᓈᓐ ᓂᑎᑖᐅᒡ ᔨᐤ᙮ ᒫᒌᔨᒄ ᐋᔥᑎᒥᒄ ᓂᑎᑖᐅᒡ ᔨᐤ᙮ ᒀ ᐊᑎ ᒋᐦᒋᐱᐦᑖᔮᓐ ᔨᐤ᙮ ᒑᐦᒋᐱᐦᐄᑐᔮᐦᒡ ᔨᐤ᙮ ᔖᔥ ᓂᑭ ᐱᒥᑖᐹᓈᓐ ᓂᑑᑎᓈᓐ ᐃᑖᐤ ᐊᓂᔮᐦ ᐊᔨᔥᒌᒫᐤᐦ᙮ ᒑᒃ ᐙᑎᐦᑎᒧᒋᐦᑦ ᐅᔮ ᐅᒫᔅᑭᓈᐙᐤ ᔨᐤ᙮ ᑳ ᐹᒥᒥᑎᐦᑎᒋᐦᒡ ᔨᐤ᙮ ᒑᒃ ᐙᑎᐦᑎᒋᐦᒡ ᐊᓂᑖ ᔨᐤ᙮ ᒑᒃ ᐙᑎᐦᑎᐦᒡ ᑮᑆ ᔨᐤ᙮ ᐋᑯᑦ ᒫᒃ ᑮᑆ ᐙᐦᒋ ᐐᒑᐅᒋᐦᒡ ᔨᐤ᙮ ᓈᐅᔥ ᑮᑆ ᐊᔮᐱᒡ ᐹᒧᐦᑖᔮᐦᒡ ᔨᐤ᙮
ᐊᓐ ᒫᒃ ᐊᓂᑖ ᐋ ᐊᑎ ᐃᑐᐦᑖᔮᐦᒡ ᔨᐤ᙮ ᓈᐅᔥ ᑮᑆ ᔖᔥ ᑳ ᐱᒧᐦᑖᔮᐦᒡ ᔨᐤ᙮ ᒑᒃ ᐙᑎᐦᑎᒫᐦᒡ ᐊᔅᒌ ᓂᑎᑖᔨᐦᑖᓈᓐ ᔨᐤ᙮ ᐊᓐ ᐋ ᒌ ᐲᑯᐱᔨᑦ ᐊᓂᑖ ᔑᔓᒡ ᒥᔅᑯᒦ, ᐋᐅᒄ ᐙᑎᐦᑎᒫᐦᒡ ᔨᐤ᙮ ᐋ ᐊᑎ ᑯᔅᐱᑎᒫᐦᒡ ᑮᑆ ᓂᑑᑎᓈᓐ᙮ ᒑᒃ ᑮᑆ ᒑᔅᒑᔨᐦᑎᒫᐦᒡ ᐊᔅᒌ ᐙᑎᐦᑎᒫᐦᒡ ᔨᐤ᙮
ᑯᔮᑦ ᐊᓐ ᐊᔨᔥᒌᒫᐤ ᔨᐤ, ᐊᓐ ᑳ ᐐᒑᐅᒋᐦᑦ ᔨᐤ, ᐊᑳ ᐱᑦ ᔨᐤ ᐃᑖᐤ᙮ ᐱᑦ ᒫ ᐊᐱᔒᔥ ᐊᓂᑖ ᓂᑭ ᐃᑐᐦᑖᓐ ᔨᐤ᙮ ᐋᔪᐎᒄ ᒫᒃ ᒑᑐᐦᑖᑦ ᐃᑖᐤ᙮ ᓂᒥ ᓈᔥᒡ ᐊᓂᐦᐆ᙮ ᓂᒥ ᓈᔥᒡ ᐊᓂᐦᐆ ᐃᑖᐤ ᑳᑭᔮ᙮ ᑯᔮᑦ ᐃᑖᐤ, ᒫᐅᑖ ᐃᐦᑎᑯᓂᐎᒋᒑ ᒦᒋᐙᐦᑉ ᔨᐤ ᐃᑖᐤ᙮ ᐹᔓᒡ ᔨᐤ ᐃᑖᐤ᙮
ᐋᔪᐎᒄ ᒫᒃ ᑳᑭᔮ, ᑮᑆ, ᐊᓂᑖ ᐋ ᐃᑐᐦᑖᔮᐦᒡ ᔨᐤ᙮ ᐊᒄ ᐃᔮᐱᐦᑯᓈᒡ ᐊᓂᔮᐦ ᐊᑎᒽᐦ᙮ ᒑᐦᒋᐱᐦᐄᑐᒡ ᐊᓂᒡ ᐊᑎᒧᒡ᙮ ᐊᓂᑖ ᐋ ᐃᔅᐱᐦᐄᑐᒡ ᔨᐤ᙮ ᑖᐹ ᐎᓈᔨᐦᑎᒧᒡ ᐊᓂᔮ ᒦᒋᐙᐦᐱᔨᐤ ᑖᓂᑖ ᐋ ᐃᐦᑎᑯᓂᔨᒡ᙮ ᐊᓂᑖ ᐋ ᐃᑐᐦᑖᔮᐦᒡ᙮ ᐋᔪᐎᒄ ᑖᑆ ᐅᔮ ᐐᒋᐙᐤ ᐹᔓᒡ ᐊᓂᑖ ᐅᑖᐹᓈᔅᒄ ᒫᔅᑭᓈᐦᒡ᙮
ᐋᔪᐎᒄ ᐊᓂᔮ ᑳ ᐃᑖᒋᒧᒡ ᐊᓂᔮ ᓅᐦᑖᐐ᙮ ᒌ ᓂᔥᑎᐎᒡ ᐊᓂᒌ ᐄᔨᔨᐅᒡ, ᓅᐦᑖᐐ ᐊᓂᔮ, ᐊᓂᔮ ᒌᒫᓂᑰᒃ ᒋᔖᔨᔨᐤ, ᒑᓖ ᒫᒃ, ᐊᓂᔮ ᒑᓖ ᑆᐱᔥ᙮ ᐋᐅᑯᓂᒡ ᐊᓂᒡ᙮ ᐋᔪᐎᒄ ᒫᒃ ᐊᓂᔮ, ᒥᓯᐙ ᑳ ᐎᓂᐦᐋᒡ ᐊᓂᔮᐦ ᐅᑖᒥᐙᐤᐦ ᑭᔮ ᐊᓂᔮᐦ ᐅᑖᐹᓈᔅᑯᐙᐤᐦ᙮ ᐊᓂᔮ ᐅᑑᑎᐙᐤ, ᐋᔪᐎᒄ ᑳ ᐹᒋ ᓈᑎᑳᔅᑯᐦᑎᑖᒡ, ᑳ ᐹᒋ ᐅᑖᐹᔨᒡᐦ ᐊᓂᔮᐦ ᐊᑎᒽᐦ ᐊᓂᔮᐦ ᑳ ᐅᑎᓈᑭᓂᐎᔨᒡᐦ᙮
ᐋᔪᐎᒄ ᑮᑆ ᑳ ᐹᔥᐱᓈᐙᒋᐦᐅᒡ ᑖᑆ, ᐋᔪᐎᒄ ᐊᓂᔮ᙮ ᐋᐅᒄ ᑳ ᐹᐦᑎᒫᓐ᙮ ᐋᑯᑦ ᑳ ᐃᐦᑖᑦ ᐊᓂᔮ ᓅᐦᑖᐐ, ᑳ ᐹᔥᐱᓈᐙᒋᐦᐅᒡ ᐊᓂᔮ ᐋᑳ ᐅᐦᒋ ᒥᔻᔨᒡ ᐊᓂᑖ ᐋ ᒌ ᐙᐹᐦᐆᑯᒡ᙮