ᑳ ᐹᔨᑯᔑᑦ

Share Button

ᐃᓛᐃᓵ ᐌᑉ ᐋ ᒌ ᑎᐹᒋᒧᑦ
ᐱᕌᔨᓐ ᐌᑉ ᐋ ᒌ ᐃᑣᔥᑎᒫᑎᐦᒃ ᑭᔮ ᐋ ᒌ ᒥᓯᓂᐦᐊᐦ

ᐋᐃ ᒦᓐ ᓂᑭ ᑎᐹᒋᒫᐤ, ᓂᒌ ᐃᐦᑖᓐ ᑮᑆ ᐊᓐ, ᐊᓐ ᑮᑆ ᐋ ᒌ ᐅᐦᑎᔒᒥᐦᑦ ᐙᒥᔥᑎᑯᔒᐤ᙮ ᐊᓂᑦ ᐋᐦᒋᑯᓂᑭᐦᐱᐦᒡ, ᐋᑯᑦ ᐊᓂᑦ ᐊᔮᐱᒡ ᑳ ᐃᐦᑖᔮᐦᒡ ᐋᐦᒋᑯᓂᑭᐦᐱᐦᒡ ᐋ ᑎᒀᒋᐦᒡ᙮ ᒫᒀᒡ ᐋ ᓅᒋᐱᔮᓱᐙᓂᐎᒡ᙮ ᐊᓂᒌ ᐙᔥ ᐊᐙᓂᒌ ᑳ ᐙᐱᐦᑎᐦᒡ ᐋᐦᒋᑯᓂᑭᐦᐱᔨᐤ, ᒫᓂᑖ ᐙᔥ ᑭᔮ ᑎᑯᐦᑖᐅᐦᒡ ᑳ ᒌ ᒋᒥᑖᐦᒡᐦ ᑭᔮ ᒫᐦᑮᐦ᙮ ᓈᔥᒡ ᐙᔥ ᐋ ᐃᔮᒡ, ᐊᐅᔖᔮᐅᐦᑳᐤ ᐙᔥ ᐊᓂᑦ, ᐊᓂᑦ ᑮᑆ ᐙᔅᑳᐦᐄᑭᓐᐦ ᐋ ᒋᒥᑖᒡᐦ ᐊᓄᐦᒡ᙮ ᐊᓂᑦ ᒫᒃ ᐹᒋ ᓃᐦᑖᐦᒡ, ᐋᑯᑦ ᒑᒥᑖᒡᐦ ᐊᓂᐦᐄ ᐙᔅᑳᐦᐄᑭᓐᐦ᙮ ᐋᑯᑖ ᐊᓂᑖ ᓂᔮᓐ ᑳ ᒋᒥᑖᒡ ᓂᒫᐦᑮᒥᓈᓐ᙮ ᒌ ᓃᔓᒨᐦ ᓂᒫᐦᑮᒥᓈᓐᐦ᙮ ᐊᓂᔮᐦᑳ ᒞᓐ ᓯᓅᑆᐃ, ᕚᐃᓕᑦ ᒫᒃ, ᐋᐅᑯᓂᒡ ᑳ ᐐᒋᒥᒋᐦᒡ ᑳ ᓃᔓᒧᐦᒡ ᓂᒫᐦᑮᒥᓈᓐᐦ᙮ ᐋᒄ ᐊᓂᑖ ᑎᑯᐦᑖᐅᐦᒡ ᑳ ᐐᒋᒡ ᐱᔥᒡ ᐊᐙᓂᒌ᙮

ᑳ ᒌ ᐃᐦᑎᓈᓂᐎᒡ ᐊᓐ ᑮᑆ ᒥᔮᑎᓂᐙᒌᔑᑳᒡᐦ, ᐋ ᒥᔪᐦᑳᑭᓂᐎᒡᐦ ᑮᑆ ᒦᒋᐙᐦᑉᐦ᙮ ᐋᑎᔥ ᐋᑳ ᑮᑆ ᐅᐦᒋ ᐃᐦᑖᒡ ᔑᐦᑖᑯᓂᒡ, ᒦᓂᑭᔑᐤᐦ ᐙᔥ ᒌ ᐋᐱᑎᓐᐦ᙮ ᒸᐦᒡ ᑮᑆ ᐋ ᐋᐦᑎᓈᔅᒑᓂᐎᒡ ᐋ ᐃᓈᓂᐎᒡ, ᐋ ᐋᐦᑎᒧᐦᑖᑭᓂᐎᒡᐦ ᐊᓂᑦ ᒫᐦᑮᐦᒡ ᐲᐦᑎᑭᒥᐦᒡ, ᐋ ᐋᐦᑎᒧᐦᑖᑭᓂᐎᒡᐦ ᐊᓂᐦᐄ ᒦᓂᑭᔑᐤᐦ᙮ ᑳ ᒌ ᓂᑐᐙᐱᐦᑖᑭᓂᐎᒡᐦ ᐊᓂᐦᐄ ᒦᓂᑭᔑᐤᐦ᙮ ᓈᔥᒡ ᐙᔥ ᒌ ᒥᔻᐤᐦ᙮ ᒸᐦᒡ ᓈᔥᒡ ᐋ ᑭ ᒋᔅᐱᑳᒡᐦ ᑭᔮ ᐋ ᐃᔑᓈᑯᐦᒡᐦ ᐊᓂᐦᐄ ᒦᓂᑭᔑᐤᐦ – ᐊᓂᐦᐄ ᑮᑆ ᐊᔨᔅᒌᒥᓐᐦ ᐋ ᒋᑭᒧᐦᒡᐦ, ᒦᓂᑭᔑᐤᐦ ᑳ ᐃᔑᓂᐦᑳᑖᒡᐦ᙮ ᑖᐹ ᒥᓯᐙ ᐅᐦᒋ ᒋᑭᒨᐦ ᒦᓂᔥᐦ, ᐊᓂᐦᐄ ᒦᓂᑭᔑᐤᐦ᙮ ᐋᐅᑯᓐᐦ ᒫᒃ ᐊᓂᐦᐄ ᑳ ᒌ ᐅᑎᓂᑭᓂᐎᒡᐦ ᒫᓐᐦ᙮ ᑳ ᒌ ᒥᓂᐱᑎᑭᓂᐎᒡᐦ, ᑳ ᒌ ᐊᓈᑭᓱᓈᓂᐎᒡ᙮ ᒸᐦᒡ ᐊᓂᑖ ᔑᐦᑖᑯᓂᒡ ᐋ ᐃᑖᐱᑎᓰᒡ, ᐊᓂᑖ ᑮᑆ ᔑᐦᑖᑯᓂᒡ ᐋ ᐋᐱᒋᐦᐋᑭᓂᐎᒡ᙮

ᐋᐅᒄ ᒫᒃ ᐊᓐ ᑳ ᒌ ᐃᐦᑎᓈᓂᐎᒡ ᐊᔮᐱᒡ ᐊᓂᑖ ᑮᑆ ᐋ ᒫᑎᓂᐙᒌᔑᑳᒡ᙮ ᑳ ᒌ ᒥᔪᐦᑭᐦᒡ ᐊᐙᓂᒌ ᐐᒋᐙᐤᐦ ᐊᓂᔮ ᑳ ᒌ ᐋᐦᑎᒧᐦᑖᐦᒡ ᑮᑆ᙮ ᓈᔥᑏᒡ ᑮᑆ ᑳ ᒌ ᔒᑭᐙᔮᑭᔑᑯᔥᑖᒡᐦ ᑭᔮ ᐊᓂᐦᐄ ᑮᑆ ᒦᓂᑭᔑᐤᐦ᙮ ᑳ ᒌ ᐋᐦᑎᒧᐦᑖᔮᐦᒡ, ᑳ ᒌ ᐋᐦᑎᒧᐦᑖᔮᐦᒡ᙮ ᑳ ᒌ ᐐᒋᐦᐄᐙᔮᓐ ᑭᔮ ᐋ ᒥᓂᐱᑎᑭᓂᐎᒡᐦ᙮ ᑳ ᒌ ᐐᐅᔑᓈᓂᐎᒡ᙮ ᐙᐳᔮᓐ ᐋ ᐱᐱᑳᒡ, ᐋᑯᑦ ᐙᔥ ᑳ ᒌ ᐙᐙᒋᓂᑭᓂᐎᒡᐦ᙮ ᐋ ᐱᔅᑯᔮᐱᐦᑎᑭᓂᐎᒡᐦ, ᐋ ᐹᒋ ᐐᐅᔑᑦ ᐊᐙᓐ᙮

ᐋᐅᒄ ᒫᒃ ᐊᓐ ᓈᔥᒡ ᐋ ᒥᔪᒋᔅᒋᔮᓐ᙮ ᑖᐹ ᑮᑆ ᒥᓯᐙ ᓂᒋᔅᒋᓐ ᐊᓐ ᑮᑆ ᑳ ᐊᑎ ᐃᔅᐱᔨᒡ ᐊᓐ ᒑᒀᓐ᙮ ᐋ ᐊᑎ ᐅᑖᑯᔑᒡ, ᐋᐅᒄ ᐊᓐ ᒌ ᒫᑎᓂᐙᒌᔑᑳᒋᒑ ᑮᑆ᙮ ᐱᔮᒋ ᑎᑯᔑᐦᒃ ᐊᓂᔮ ᓂᑐᓯᔅ, ᑳᕐᓛᐃᓐ᙮ ᑳᕐᓛᐃᓐ ᒥᓂᕆᒃ ᐱᔮᒋ ᑎᑯᔑᐦᒃ ᐊᓂᑦ ᓃᒋᓈᐦᒡ᙮ ᒀᑖᑦ ᐆ, ᐱᔮᒋ ᐲᐦᒋᒑᑦ ᐊᓂᑦ ᓃᒋᓈᐦᒡ, ᒀᑖᑦ ᐆ ᓵᐃᒥᓐᐦ, ᐋᔥᒄ ᐙᔥ ᒌ ᐊᐱᔥᑖᐹᐅᔑᐤ ᓵᐃᒥᓐ᙮ ᑖᐹ ᐋᔥᒄ ᐅᐦᒋ ᒋᔖᔨᔨᐆ᙮ ᒀᑖᑦ ᐆ, ᐹᒋ ᐐᒑᐤᐦ ᒫ, ᐃᑖᐤ᙮ ᒦᓂᑭᔑᐤᐦ ᓂᑭ ᓂᑐᐙᐱᐦᑖᓐ᙮ ᒑ ᐱᐦᒧᑣᐤ ᐱᔮᔒᔑᒡ ᐊᓂᑖ ᐋ ᐃᐦᑖᔨᐦᒄ, ᐃᑖᐤ᙮ ᓈᔥᒡ ᑮᑆ ᐋ ᓯᒋᔮᒥᑯᑦ ᓵᐃᒥᓐ᙮ ᐙᒑᐙᑦ᙮ ᐋᔪᒀᓈᐦᑳ ᒑᑐᐦᑖᒡ᙮ ᐊᒄ ᐅᑎᐦ ᑮᑆ ᓂᔮᓐ ᐋ ᐃᐦᑖᔮᐦᒡ ᓂᒫᐦᑮᒥᓈᐦᒡ᙮

ᒑᒃ ᐎᔮᐱᒥᒀᐤ ᐱᔮᑖᔥᑎᒧᐦᑖᒡ᙮ ᓂᐙᐱᒫᐅᒡ ᑭᔮ ᓃᔨ ᐱᔮᑖᔥᑎᒧᐦᑖᒡ, ᓈᔥᒡ ᐋ ᐐᐦ ᐹᒋ ᒫᒌᒡ᙮ ᐋ ᐹᒋ ᒫᒌᑦ ᑮᑆ ᐊᓐ ᓂᑐᓯᔅ, ᐱᔮᒋ ᓯᒋᓂᔅᒑᓈᑦ ᐊᓂᔮᐦ ᓵᐃᒥᓐᐦ᙮ ᒑ ᐊᐱᔒᔑᔨᐤᐦ ᐙᔥ ᐋᔥᒄ, ᒌ ᐊᐙᔑᔒᐅᔨᐤᐦ᙮ ᑖᐹ ᓂᒋᔅᒑᔨᒫᐤ ᑳ ᐃᐦᑐᐳᓍᓯᔨᒡᐦ᙮ ᓈᔥᑏᒡ ᓂᒥ ᐹᑖᐅᒡ ᒑᒀᔨᐤ᙮ ᒑᔅᒑᔨᒥᒃ ᑭᔮ ᐋᑳ ᐹᒋ ᐐᐅᔑᑦ ᑭᔮ ᐊᓂᔮᔨᐤ, ᐊᓂᔮᐦ ᑮᑆ ᒦᓂᑭᔑᐤᐦ, ᐋᑳ ᐹᑖᑦ᙮ ᐱᔮᒋ ᑎᑯᔑᐦᒡ, ᓈᔥᒡ ᐋ ᐹᒋ ᓵᒑᔨᐦᑎᐦᒃ᙮

ᑯᔮᑦ, ᓂᐙᐱᒫᓈᓐ ᐙᔥ ᐊᓂᑖ ᐊᐙᓐ᙮ ᐹᑖᔥᑎᒧᐦᑖᐤ, ᔨᐤ᙮ ᐹᒋ ᔖᔖᒋᔥᑎᒀᓈᐤ᙮ ᓈᔥᑏᒡ ᐅᓵᐅᔥᑎᒀᓈᐤ, ᔨᐤ᙮ ᐱᔮᑖᔥᑎᒧᐦᑖᑦ, ᔨᐅᒡ᙮ ᐋᔪᐎᒄ ᒫᒃ ᐊᓂᔮ ᐙᐦᑎᒧᐙᑭᓂᐎᒡ᙮ ᐊᓂᔮ ᐙᔥ, ᐋᔥᒄ ᒌ ᐱᒫᑎᓰᐤ ᐊᓂᔮ ᓂᒧᔔᒥᓈᓐ ᐱᔥᑎᒀᔮᐤ ᒋᔖᔨᔨᐤ ᒌ ᐃᔑᓂᐦᑳᑖᑭᓂᐤ᙮ ᒞᐤ ᓯᓅᑆᐃ ᒌ ᐃᓯᓂᐦᑳᓯᐤ᙮ ᐋᔥᒄ ᑮᑆ ᑖᐱᔥᑯᓐ ᑳ ᐱᒫᑎᓯᔨᒡᐦ ᐊᓂᔮ ᐅᒋᔖᐃᔥᒀᒥᔥᐦ, ᒫᐃᓈ ᒌ ᐃᓯᓂᐦᑳᓱᔨᐤᐦ᙮ ᑭᔮ ᐊᓐ ᓵᓐᑏ ᓯᓅᑆᐃ, ᐋᔪᐎᑯᓐᐦ ᐙᔥ ᑳ ᐅᑳᐐᑦ ᐊᓂᔮᐦ ᑳ ᐐᐅᔨᒡᐦ ᒋᔖᔨᔨᐤᐦ᙮ ᐊᓂᑖ ᑎᑯᐦᑖᐅᐦᒡ ᒌ ᐐᒋᐅᒡ᙮ ᒌ ᓈᐅᒧᔨᐤᐦ ᐅᒫᐦᑮᒥᐙᐤᐦ᙮ ᐅᑖ ᓂᔮᓐ ᓃᐦᑖᐦᒡ᙮ ᐅᑖ ᑭᔮ ᓃᐦᑖᐦᒡ ᑳ ᐐᒋᒡ ᑭᔮ ᐊᐙᓂᒌ᙮ ᑭᔮ ᓈᑖ ᑎᑯᐦᑖᐅᐦᒡ᙮ ᒌ ᒥᐦᒑᑎᓈᓂᐤ ᐙᔥ᙮

ᒑᒃ ᑮᑆ ᐎᔮᐱᒫᑭᓂᐎᑦ ᐱᔮᑖᔥᑎᒧᐦᑖᑦ᙮ ᐊᓂᑖ ᑮᑆ ᐋ ᐄᔑ ᔖᑭᒋᐙᔮᐦᒡ ᐆ ᓂᔮᓐ, ᐆ ᑮᑆ ᐋ ᐅᔖᔮᐅᐦᑳᒡ᙮ ᐎᔮᐱᒫᑭᓂᐎᑦ ᐊᓂᑖ ᐱᔮᑖᔥᑎᒧᐦᑖᑦ ᓈᑖ᙮ ᐊᑎ ᓃᔑᓐᐦ ᐊᓂᑖ ᐙᐱᓅᑖᐦᒡ ᐙᐱᑭᔨᐅᐙᐦᑎᐦᒄᐦ᙮ ᐙᐱᑭᔨᐅᐙᐦᑎᐦᒄᐦ ᓃᔑᓐᐦ᙮ ᐹᔨᒄ ᐊᓐ ᐋᔥᑎᒥᑖ ᐊᐱᔖᔑᐤ, ᓂᒥ ᓈᔥᒡ ᑮᑆ ᒥᔥᑎ-ᐅᔖᔮᔑᐤ᙮ ᐊᒄ ᓈ ᓈᑖ ᐎᔥᑖ ᐋ ᐃᐦᑎᑯᐦᒡ, ᐋᐅᒄ ᐊᑎᑑ ᐋ ᒥᔥᑎ-ᐅᔖᔮᒡ ᐊᓐ, ᐊᓐ ᑮᑆ ᐙᐱᑭᔨᐅᐙᐦᑎᐦᒄᐦ ᐃᔑᓂᐦᑳᑎᑭᓂᐤᐦ᙮ ᑳ ᒋᒥᑖᑭᓂᐎᒡᐦ ᒥᔥᑎᒄᐦ᙮ ᐋᑯᑦ ᑮᑆ ᒌ ᐊᔥᑖᒋᒑ ᒫᓐᐦ ᐊᐙᓐ ᐅᐙᐱᑭᔨᐆᓂᐦᐄᑭᓐᐦ᙮ ᐋᐅᒄ ᐊᓐ ᐙᐦᒋ ᐃᔑᓂᐦᑳᑖᒡᐦ ᐊᓂᐦᐄ ᐙᐱᑭᔨᐅᐙᐦᑎᐦᒄᐦ᙮ ᒌ ᓃᔑᓐᐦ ᒫᒃ ᐊᓂᐦᐄ᙮ ᐋᑯᑖ ᓈᑖ ᐱᔮᑖᔥᑎᒧᐦᑖᐅᑦ ᐙᐱᓅᑖᐦᒡ, ᐋᐅᒄ ᐊᓐ ᐱᔮᑖᔥᑎᒧᐦᑖᑦ ᐊᐙᓐ ᑮᑆ᙮

ᒥᓯᐙ ᑮᑆ ᐋ ᒌ ᐃᐦᑖᒡ ᐅᒌ, ᑖᐹ ᓂᒋᔅᒑᔨᐦᑖᓐ ᒥᓯᐙ ᑳ ᐃᐦᑖᐙᒀ ᐅᒌ ᓈᐹᐅᒡ᙮ ᑖᐹ ᓂᒋᔅᒑᔨᐦᑖᓐ ᑭᔮ, ᒌ ᒫᑎᓂᐙᒌᔑᑳᐤ ᐙᔥ᙮ ᒑᒃ ᑮᑆ ᐱᔮᒋ ᐹᓱᓈᑯᓯᑦ᙮ ᓈᔥᑐᐎᓈᑯᓯᑦ ᑮᑆ ᐋᑳ ᐄᔨᔨᐤ, ᐄᔨᔨᐤ ᑮᑆ ᐐ᙮ ᐱᔮᒋ ᓃᐳᐎᑦ ᓈᑖ᙮ ᒥᒄ ᓰᑎᐤ ᐱᔮᒋ ᓃᐳᐎᑦ ᑭᔮ ᒫᒃ ᐋ ᐙᐦ ᐙᐃᐱᑦ ᐊᓂᔮ ᐊᓯᓃᔨᐤ ᐹᔨᒄ ᐊᓂᑖ ᐋ ᐊᔥᑖᔨᒡ ᐊᔅᒌᐦᒡ ᑮᑆ᙮ ᐋ ᐙᐃᐱᑦ, ᒧᔮᒻ ᐋ ᐊᒋᔥᑖᐅᓂᐱᑦ ᑮᑆ ᐋ ᐃᓯᓈᑯᓯᑦ᙮ ᒧᔮᒻ ᐋᑳ ᒌ ᒥᔪᐱᒧᐦᑖᑦ ᑮᑆ ᒀᓯᓈᑯᓯᑦ, ᒦᓐ ᐱᔮᒋ ᐱᓯᑯᑦ᙮

ᐊᒄ ᐊᓂᔮ ᓂᒧᔔᒥᓈᓐ ᐱᔥᑎᒀᔮᐤ ᒋᔖᔨᔨᐤ, ᑯᔮᑦ ᓂᑭ ᓈᑖᐤ, ᔨᐤ᙮ ᑖᐹ ᑮᑆ ᐅᐦᒋ ᒌ ᐊᔨᒥᐦᐋᐤ᙮ ᑖᐹ ᐅᐦᒋ ᑭᔅᒋᐦᐆ ᐋ ᐙᒥᔥᑎᑯᔒᐅᔨᒥᑦ᙮ ᒸᐦᒡ ᐊᓂᑖ ᐋ ᔖᔖᒀᔨᒧᑦ ᒌ ᐃᐦᑏᒋᒑ ᒑ ᒌ ᐹᒋ ᓈᑎᐦᒃ ᐅᔮᐦ ᒦᒋᐙᐦᐱᔨᐤ ᑭᔮ ᐋᑳ ᒋᔅᒑᔨᐦᑎᐦᒃ ᑖᓐ ᒑ ᐃᐦᑑᑐᐙᑭᓂᐎᑦ ᑮᑆ ᐹᒋ ᐅᑎᐦᑎᐦᑳ᙮ ᒌ ᑯᔥᑖᒌᒋᒑ ᑮᑆ ᐋᔪᐦ᙮

ᐱᔮᒋ ᑎᑯᔑᐦᒃ᙮ ᑖᑆ ᑮᑆ ᐋᐅᒄ ᐆ ᐙᒥᔥᑎᑯᔒᐤ᙮ ᓈᔥᒡ ᐋ ᐲᑯᐱᔨᔨᒡᐦ ᐊᓂᔮᐦ ᐅᒑᒀᓂᒻᐦ, ᐅᒑᒀᓂᒻᐦ ᑮᑆ ᐊᓂᔮᐦ ᒑᒋᔥᑭᐦᒃ᙮ ᐋᐅᒄ ᒫᒃ ᑎᔮᐳᔥᑭᐙᑦ ᐊᓂᔮ ᓂᒧᔔᒥᓈᓐ ᐱᔥᑎᒀᔮᐤ ᒋᔖᔨᔨᐤ, ᐱᔮᒋ ᐐᒑᐙᑦ᙮ ᐋ ᐊᑎ ᐲᐦᑎᑭᐦᐋᑦ ᐊᓂᑦ ᐐᒋᐙᐤᐦ᙮ ᒌ ᓈᐅᒧᔨᐤᐦ ᐊᓂᔮᐦ ᐅᒫᐦᑮᒥᐙᐤᐦ᙮ ᐋᑯᑦ ᐹᐦᑎᑭᐦᐋᑦ᙮

ᐋᑯᑦ ᒫᒃ ᓈᔥᒡ ᐐᐦ ᐃᔅᐱᔨᐦᐅᒋᒑᓂᒌ ᑮᑆ ᐊᐙᓂᒌ, ᐅᒌ ᑮᑆ ᐙᐦ ᐙᐱᒫᒡ᙮ ᐋᑯᑖ ᑮᑆ ᓂᑏᐦᑖᓈᓈᒋᒑ ᒑᔅᒋᔮᓐ ᐋᐅᒄ ᐊᓐ᙮ ᑳ ᐃᑎᔓᐙᑦ ᐋᐅᒄ ᐊᓂᔮ ᓂᒧᔔᒥᓈᓐ ᒑ ᒥᔮᑭᓂᐎᔨᒡᐦ ᒦᒋᒥᔨᐤ, ᐋᐃᐦᑯᓈᐤᐦ ᑮᑆ ᑭᔮ, ᑭᔮ ᑏᔨᐤ ᒑ ᒥᓂᐦᒀᔨᒡᐦ᙮ ᐋ ᐊᔨᒥᐦᐋᑦ ᐱᑎᒫ᙮ ᐋ ᐊᔨᒥᐦᐋᓂᐎᒡ᙮ ᐋ ᐅᒋᔥᒌᐦᑯᓂᐱᓈᓂᐎᒡ᙮ ᑳ ᒌ ᐃᐦᑎᓈᓂᐎᒡ ᐙᔥ᙮ ᐋ ᐊᔨᒥᐦᐋᑦ, ᐊᓂᑖ ᑮᑆ ᐋ ᐊᔨᒥᐦᐋᓂᐎᒡ ᐋ ᐃᐦᑎᓈᓂᐎᒡ, ᒀᐦᑎᒃ᙮

ᐋᔪᐎᒄ ᒫᒃ ᐊᓂᔮ ᒫᒋᓱᔨᒡᐦ ᑮᑆ ᐋᑎᐐ᙮ ᓈᔥᒡ ᑮᑆ ᓂᒥᔅᑳᓯᓂᐙᓈᓈᒋᒑ᙮ ᓈᔥᒡ ᑮᑆ ᓂᒥᔅᑳᓯᓂᐙᓈᓈᒋᒑ, ᓂᑯᔥᑖᒋᐳᔮᓈᓈᒋᒑ ᑭᔮ ᐅᔮ ᐙᐦᒋ ᐋᑳ ᓈᔥᒡ ᐅᐦᒋ ᒌ ᒦᒋᓱᑦ᙮ ᐋᔪᐎᒄ ᒫᒃ ᐊᓂᔮ ᑳ ᐃᐦᑎᒃ, ᑳ ᐅᐦᑎᔒᒥᐦᑦ᙮ ᐋᑯᑦ ᒫᒃ ᐊᓂᑦ ᑳ ᐃᐦᑖᔨᒡᐦ ᐐᒋᐙᐦᒡ, ᐋᐅᒄ ᐊᓐ ᒋᔖᔨᔨᐤ᙮ ᐊᓂᒌ ᓵᓐᑏ ᐐᒋᐙᐦᒡ, ᐋᑯᑦ ᑳ ᐃᐦᑖᔨᒡᐦ᙮

ᐋᒄ ᐊᓂᔮ ᒫᒃ ᐙᐦᒋ ᐃᓯᓈᑯᓯᑦ ᐊᓂᔮᔨᐤ, ᐊᓂᔮ ᑮᑆ ᐋᑳ ᐅᐦᒋ ᒌ ᒥᔪᐱᒧᐦᑖᑦ, ᑳ ᒫᑎᔓᑯᑯᐱᓈ᙮ ᑳ ᒥᓂᓂᐦᒃ ᐊᓂᔮ ᐅᒥᔅᒋᓐ, ᐅᑖᔅ ᑭᔮ᙮ ᓈᔥᑏᒡ ᐊᓂᑖ ᒌ ᐄᔑ ᐴᔥᑯᔔᒑᐱᔨᔨᐤ ᐊᓂᔮ ᐅᓯᑦ᙮ ᒌ ᐴᔥᑯᔔᒑᐱᔨᔨᐤ ᐊᓂᔮ ᐊᓯᓃᔨᐤ ᐋ ᒌ ᑎᑯᔅᑳᑎᐦᒃ ᑮᑆ, ᐋ ᒌ ᓵᓵᒋᔅᑎᒃ᙮ ᓈᔥᑏᒡ ᐊᓂᑖ ᐄᔑ ᐋᐱᐦᐄᐱᔨᔨᐤ ᐊᓂᔮ ᐅᓯᑦ᙮ ᐋᒋᒃ ᐋᔪᐎᒄ ᐊᓂᔮ ᐋ ᐃᔮᑯᓯᑦ᙮

ᑯᔮᑦ, ᓂᓂᑐᐙᔨᐦᑖᓐ ᐙᔥ ᒑ ᒋᐳᒀᑎᑭᓂᐎᒡ, ᔨᐤ, ᐃᔥᑐᐦᑐᐙᑭᓂᐤ᙮ ᐊᓂᒌ ᐙᔥ ᐊᓂᔮ ᕚᐃᓕᑦ ᓯᓅᑆᐃ, ᐊᓂᒌ ᒫᒃ ᕕᓨᕌ, ᐋᐅᑯᓂᒡ ᑳ ᐊᔨᒥᐦᐋᒡ, ᐋᐅᑯᓂᒡ ᑳ ᑭᔅᒋᐦᐅᒡ ᐋ ᐙᒥᔥᑎᑯᔒᐅᔨᒥᒡ᙮ ᐋᐅᑯᓂᒡ ᑮᑆ ᐋ ᐊᔨᒥᐦᐄᑯᒡ, ᐙᐦᑎᒫᑯᒡ ᐋ ᐄᔑ ᓂᑐᐙᔨᐦᑎᒥᔨᒡᐦ᙮ ᐋᒄ ᐊᓂᔮ ᒫᒃ ᒑᒀᔨᐤ ᒑ ᐋᐱᑎᓂᔨᒡ ᐊᓂᔮᔨᐤ ᑮᑆ ᒑ ᑭᔅᒋᒀᑎᓂᐎᔨᒡ ᐊᓂᔮᔨᐤ ᔖᐴᓂᑭᓂᔨᐤ ᒑ ᐋᐱᑎᓂᔨᒡ ᑭᔮ ᑭᔅᒋᒀᓲᓈᔮᐲᐦ᙮ ᓈᑐᐙᔨᐦᑎᐦᒃ ᒑ ᐅᓯᑭᓂᐎᔨᒡ ᐱᑎᒫ, ᐋ ᐅᐦᑖᔨᒡ ᓂᐲᔨᐤ, ᐋᑯᑦ ᒑ ᐱᑭᔥᑎᐙᐦᐄᑭᓂᐎᔨᒡᐦ᙮ ᐋᔪᐎᒄ ᐋ ᐄᔑ ᓂᑐᐙᔨᐦᑎᐦᒃ᙮ ᐋᒄ ᐅᒌ ᑮᑆ ᐃᔅᒀᐅᒡ, ᓈᔥᑏᒡ ᓂᒥ ᒌ ᐃᐦᑑᑎᒧᒡ ᑮᑆ, ᓂᒥ ᑖᑆᐦᑎᒧᒡ ᑭᔅᒋᒀᑎᒸᐦᒄ ᐋ ᐃᑖᑭᓂᐎᒡ ᐊᓂᔮ ᐅᓯᑎᔨᐤ, ᒑ ᔑᒋᔥᑎᐦᐋᒸᒡ ᑮᑆ᙮

ᐋᒄ ᐊᓂᔮ ᒧᓱᔅ ᒥᓂᕆᒃ ᒌ ᐃᓯᓂᐦᑳᓲ ᒋᔖᔨᔨᐤ, ᓈᐹᐤ᙮ ᓂᑳᐐ ᐊᓂᔮᐦ ᐅᔅᑖᔅᐦ᙮ ᐋᐅᒄ ᐊᓐ ᑳ ᑭᔅᒋᒀᑎᒸᑦ ᐊᓂᔮ ᐅᓯᑎᔨᐤ᙮ ᑖᐹ ᓂᒋᔅᒑᔨᒫᐤ ᑖᓐ ᑎᐦᑣᐤ ᑳ ᔑᒋᔥᑎᐦᐋᒸᑦ ᐊᓂᔮ ᐅᓯᑎᔨᐤ᙮

ᐋᒋᒃ ᓈᑖ ᐋ ᒥᐦᒋᐦᑖᐙᔮᔨᒡ ᑳ ᐅᐦᑐᐦᑖᑦ᙮ ᑳ ᐲᒀᐦᐊᓂᔨᑯᐱᓈ ᐅᒌᒫᓐ᙮ ᐊᓂᑖ ᐙᔥ ᒨᓱᓃ ᑳ ᐅᐦᒋ ᒋᐦᑎᔥᑖᔑᑯᐱᓈ ᐋ ᐱᒫᔑᑦ ᑮᑆ᙮ ᑖᐹ ᓂᒋᔅᒑᔨᒫᐤ ᒫᒃ ᑖᓂᑖ ᑳ ᐐᐦ ᐃᑖᔑᑦ᙮ ᐊᓂᑖ ᑮᑆ ᑖᐅᒡ ᒌ ᐱᒫᔒᒋᒑ᙮ ᑭᔮ ᒫᒃ ᑖᐹ ᓂᒋᔅᒑᔨᒫᐤ ᑳ ᐹᒋ ᓈᑎᑳᒫᐱᔨᒀ ᐅᑎᐦ ᕛᕐᑦ ᒞᕐᒡ ᑮᑆ᙮ ᐊᓂᑖ ᑳ ᐅᐦᑖᔑᑦ ᐊᓂᑖ ᒨᓱᓃ᙮ ᒌ ᐹᒋ ᐴᔅᑖᑭᓂᐎᔨᒋᒑ ᐊᓂᑦ ᑎᕃᐃᓂᐦᒡ ᐊᓂᔮ ᐅᒌᒫᓐ᙮ ᐋᑯᑖ ᐊᓂᑖ ᑳ ᐃᓈᓂᐎᒡ, ᑳ ᐃᓈᓂᐎᒡ ᑮᑆ᙮

ᑖᐹ ᓂᒋᔅᒑᔨᒫᐤ ᒫᒃ᙮ ᐋᔪᐎᒄ ᒫᒃ ᑳ ᑭᔅᒋᒀᑎᓂᐎᔨᒡ᙮ ᓈᔥᒡ ᐋᑳ ᔖᒫᒡ ᐅᐦᒋ ᒌ ᐃᔮᑦ᙮ ᑯᑎᒋᔨᐤ ᒦᓐ ᒑᒀᔨᐤ ᒌ ᐋᐱᑎᓂᔨᒋᒑ ᐊᓂᔮ ᐋ ᐐᐦ ᒥᔪᐦᑖᑭᓂᐎᔨᒡ ᐊᓂᔮ᙮ ᐋᔪᐎᒄ ᒑᔅᒋᐅᒡ ᐊᓂᔮᐦ ᐋᐦᒋᑯᐱᒦᐦ, ᐋᐦᒋᑯᐐᔪᐦ ᑮᑆ ᐋ ᐋᐱᒋᐦᐋᑭᓂᐎᔨᒡᐦ᙮ ᓂᑳᐐ ᐊᓂᔮ, ᐋᐅᒄ ᑳ ᐱᐱᒦᐦᑭᒸᑦ ᐊᓂᔮ ᐅᓯᑎᔨᐤ᙮ ᒑᒃ ᓈᔥᑏᒡ ᑳ ᒥᔻᔑᔨᒡ ᐊᓂᔮ ᐅᓯᑦ᙮ ᒌ ᒥᔻᔑᔨᒋᒑ ᑮᑆ, ᑳ ᒥᔪᑆᒧᐦᑖᑦ᙮

ᐋᒄ ᐊᓂᔮ ᒦᓐ ᒑᔅᒋᐅᒡ ᐊᓂᑖ ᐋ ᓂᑐᐙᔨᐦᑎᐦᒃ ᒑ ᒧᐙᐱᑦ ᑮᑆ, ᐊᓂᑖ ᒑ ᐄᔑ ᒧᐙᐱᑦ ᐲᔑᐳᔨᔨᔥᑎᑯᐦᒡ᙮ ᐋᔥᒄ ᒌ ᐃᐦᑎᑯᓐ ᐊᓂᑖ ᐊᑖᐙᐅᑭᒥᒄ᙮ ᐊᓂᑖ ᑳ ᐃᑐᐦᐅᔮᑭᓂᐎᑦ᙮ ᑳ ᐴᓯᐦᐋᑭᓂᐎᑦ, ᐆᑎᔨᐤ ᑮᑆ ᑳ ᐋᐱᒋᐦᑖᒡ᙮ ᐊᓂᔮ ᐙᔥ ᐎᓖ ᔅᐯᓐᓯᕐ, ᐋᐅᒄ ᐙᔥ ᒫᒀᒡ ᑳ ᐅᒋᒫᐅᑦ ᐊᓂᑦ ᑮᑆ ᐊᓂᔮᔨᐤ, ᐋᔪᐎᒄ ᐊᓂᔮ᙮ ᑭᔮ ᒫᒃ, ᑖᐹ ᓂᒋᔅᒑᔨᒫᐤ ᑖᓐ ᐙᒋᐦᒡ ᐊᐙᓐ, ᑭᔮ ᒫᒃ ᐊᓂᔮ ᐙᓪᑎᕐ ᐹᒑᐦᐋᓅ ᑳ ᐅᒋᒫᐅᒀ᙮

ᑳ ᐃᑐᐦᐅᔮᑭᓂᐎᑦ ᐊᓂᑖ᙮ ᑳ ᒑᒋᔖᐹᔮᔨᒡ ᑮᑆ ᑳ ᐴᓯᐦᐋᑭᓂᐎᑦ᙮ ᐃᔫᔥ ᑮᑆ ᑳ ᒥᔑᑳᒡ᙮ ᓈᔥᑏᒡ ᒌ ᐹᒋ ᓵᑭᔅᒋᓂᑖᐤ ᐊᓂᔮ ᐆᑎᔨᐤ, ᐊᓂᔮ ᑳ ᐋᐱᑎᓂᔨᒡ᙮ ᒥᒄ ᑮᑆ ᑳ ᐱᒥᔥᑳᒡ᙮ ᓈᔥᑏᒡ ᒌ ᐹᒋ ᓵᑭᔅᒋᓂᑖᐤ ᐊᓂᔮ ᐆᑎᔨᐤ᙮ ᓈᔥᑏᒡ ᐋᑳ ᐅᐦᒋ ᒥᓈᓂᒧᐙᑭᓂᐎᑦ ᒑᒀᔨᐤ ᐋ ᓂᑐᐙᔨᐦᑎᐦᒃ, ᐊᓂᔮ ᑮᑆ ᒑᒀᔨᐤ ᐙᐦ ᐅᑎᓂᒑᑦ᙮ ᑖᐹ ᓂᒋᔅᒑᔨᒫᐤ ᑎᐹᔨᐦᒋᒑᓯᐤᐦ ᑳ ᐋᐱᒋᐦᐄᑯᒀ ᑭᔮ ᒫᒃ, ᐊᓂᔮ ᑮᑆ ᑳ ᐃᔥᐱᔑ ᐋᑳ ᒑᒀᔨᐤ ᐅᐦᒋ ᒥᓈᓂᒧᐙᑭᓂᐎᑦ ᑮᑆ ᐋ ᓂᑐᐙᔨᐦᑎᐦᒃ ᐋ ᐅᑎᓂᒑᑦ᙮ ᑭᔮ ᐊᓂᔮᐦ ᐃᔅᒀᐤᐦ ᒑᒀᔨᐤ ᐋ ᐃᔮᐱᒋᐦᑖᑦ, ᑭᔮ ᐊᓂᔮ ᐋ ᑭᔅᒋᒀᓱᑦ, ᑭᔮ ᐊᓂᔮᐦ ᐃᔅᒀᐤ ᐋ ᐃᔮᐱᒋᐦᑖᑦ, ᒥᒋᒥᐙᐦᐄᑭᓂᔥᐦ ᑭᔮ ᔒᑭᐦᐅᓐᐦ, ᐋᔪᐎᑯᓐᐦ ᐊᓂᔮᐦ ᓈᔥᑏᒡ ᒥᓯᐙ ᒌ ᒥᔮᐤ ᐊᐙᔨᐤᐦ, ᐃᔥᒀᔥᐦ ᑭᔮ ᐊᓂᔮᐦ ᐃᔅᒀᐤᐦ᙮ ᑖᐹ ᓂᒋᔅᒑᔨᒫᐤ ᒑᒀᔨᐤ ᑳ ᒥᔮᑦ, ᑮᑆ ᑳ ᒥᔮᑦ ᑭᔮ ᐊᓂᔮᐦ ᓈᐹᔥᐦ, ᒥᓯᐙ ᒑᒀᔨᐤ, ᑭᔮ ᐊᓂᔮᐦ ᓈᐹᐤᐦ᙮ ᒥᓯᐙ ᒑᒀᔨᐤ, ᒥᓯᐙ ᐊᐙᔨᐤᐦ ᒌ ᒥᔮᐤ ᒑᒀᔨᐤ᙮ ᑳ ᐃᐦᑎᒃ ᐊᓂᔮᔨᐤ ᑳ ᒧᐙᐱᒡ ᑮᑆ ᐊᓂᔮᔨᐤ, ᐊᓂᑖ ᑳ ᐃᑐᐦᐅᔮᑭᓂᐎᑦ᙮

ᑭᔮ ᐊᓂᔮ ᒦᒋᒥᔨᐤ ᑮᑆ, ᐱᐦᒀᔑᑭᓐᐦ᙮ ᑳ ᒫᑎᓂᒫᑐᓈᓂᐎᔨᒡ ᐊᓂᔮ ᒑᒀᔨᐤ, ᐊᓂᔮ ᑮᑆ ᑳ ᐹᑎᐦᐅᑖᑦ ᐊᓂᔮ ᒦᒋᒥᔨᐤ᙮ ᒥᒄ ᑮᑆ ᐊᓐ ᒑᒀᓐ ᑳ ᐃᐦᑎᑯᐦᒡ᙮ ᑖᐹ ᒥᔥᑏ ᒑᒀᓐ ᐅᐦᒋ ᐃᐦᑎᑯᓐ᙮ ᐱᐦᒀᔑᑭᓂᒡ, ᐱᒦ, ᔔᑳᐤ, ᑏ, ᐋᔨᒋᒑ ᑭᔮ ᐊᓂᔮ ᐅᐦᐱᓯᑭᓂᔨᐤ ᑭᔮ᙮ ᐋᔨᒋᒑ ᐊᓂᔮ ᑳ ᐹᑎᐦᐅᑖᑦ᙮ ᒥᓯᐙ ᑳ ᓂᑐᐙᔨᐦᑎᐦᒃ ᒑ ᒫᑎᓂᒫᑐᔨᒡᐦ ᐊᐙᔨᐤᐦ᙮

ᐋᔪᐎᒄ ᒫᒃ ᐊᓂᔮᔨᐤ ᑳ ᐊᑎ ᐐᒋᒥᒋᐦᑦ ᑮᑆ᙮ ᒑᒃ ᑮᑆ ᓂᔮᓐ ᑳ ᐊᑎ ᐐᒋᒥᒋᐦᑦ᙮ ᐊᓂᑖ ᑳ ᐄᔑ ᓈᑎᑳᒫᐦᐋᒫᐦᒡ ᐊᓂᑖ, ᐋ ᐅᑎᐦᒋᐳᑖᒡ ᐃᔑᓂᐦᑳᑖᐤ ᐊᓂᑖ᙮ ᐋᑯᑦ ᐊᓂᑦ ᑳ ᐐᒋᔮᐦᒡ᙮ ᐋᑯᑦ ᒫᒃ ᐊᓂᑦ ᑳ ᐐᒋᒥᒋᐦᑦ᙮ ᑳ ᐐᒋᒥᒋᐦᑦ ᑮᑆ᙮ ᒧᓱᔅ ᒥᓂᕆᒃ ᒌ ᐐᒋᒫᐅᒡ ᐊᓂᑦ ᐐᒋᔨᐦᒡ᙮

ᒌ ᐋᐦᑯᓯᓈᓂᐤ ᐙᔥ ᐋᐅᒄ ᐊᓐ᙮ ᓈᔥᑖᑆ ᒌ ᐋᐦᑯᓲᒡ ᐊᐙᓂᒌ᙮ ᐱᔥᒡ ᑮᑆ ᐊᐙᓂᒌ ᐋᑳ ᐅᐦᒋ ᐃᐦᑖᒡ᙮ ᑳ ᔨᑦ ᐊᓂᔮᔨᐤ ᐋ ᐃᐦᑎᑯᓂᔨᒡ ᓈᑖ ᓂᑐᐦᑯᔨᓂᔨᐤ ᓈᑖ ᐋ ᒥᐦᒋᐦᑖᐙᔮᔨᒡ᙮ ᓂᑐᐦᑯᔨᓂᔨᐤ ᒑ ᒌ ᐐᒋᐦᐄᑯᔨᒡᐦ ᐊᐙᔨᐤᐦ᙮ ᑳ ᐃᑎᔓᒫᑦ ᐊᓂᔮᔨᐤᐦ ᒧᓱᔅ ᒥᓂᕆᒃᐦ ᓈᑖ ᒑ ᐃᑐᐦᑖᔨᒡᐦ᙮

ᔖᔥ ᐙᔥ ᒌ ᐱᒫᐱᑰ ᑰᓂᐲ ᐊᓂᑦ ᓰᐲᐦᒡ, ᒥᒄ ᐋᔥᒄ ᓂᒥ ᐅᐦᒋ ᒥᔥᑭᐎᑎᓐ᙮ ᑳ ᓂᑐᐙᔨᐦᑎᐦᒃ ᓈᑖ ᒑ ᐄᔑ ᒋᔅᑭᒥᐦᐅᔮᑭᓂᐎᔨᒡᐦ ᐊᓂᔮᐦ ᒧᓱᔅᐦ᙮ ᓈᑖ ᒑ ᐃᑐᐦᑖᔨᓐ ᐊᓂᑖ ᐊᓐ ᒌᒫᓐ ᐋ ᐃᐦᑎᑯᐦᒡ, ᐋᑯᑖ ᐋ ᐃᐦᑎᑯᐦᒡ ᓂᑐᐦᑯᔨᓐ᙮ ᒑ ᓈᓂᑐᐙᐱᐦᑎᒥᓐ, ᒌ ᐃᑖᐤ᙮ ᐋᑯᑖ ᒫᒃ ᑳ ᐃᑐᐦᑖᔨᒡᐦ ᓈᑖ ᐋ ᒥᐦᒋᐦᑖᐙᔮᔨᒡ᙮

ᑳ ᐃᑖᑦ, ᐊᑳᐐ ᒋᐱᐦᒌᐦ᙮ ᐊᓂᔮ ᑮᑆ ᑳ ᐃᔥᐱᔑ ᐃᑖᔨᒫᑦ ᐊᐙᔨᐤᐦ ᐊᓂᔮ ᑮᑆ ᑳ ᐋᐦᑯᓯᔨᒡᐦ᙮ ᓵᐃᒥᓐ ᐙᔥ ᑭᔮ, ᐋᑯᑦ ᓈᔥᒡ ᑳ ᐋᐦᑯᓯᑦ, ᐊᓐ ᑮᑆ ᓂᔒᒻ ᓵᐃᒥᓐ᙮ ᐅᑯᐦᑎᔥᑯᔨ ᓈᔥᒡ ᐋ ᒌ ᐋᐦᑯᓯᑦ᙮ ᒥᒄ ᑳ ᒌ ᓂᑐᐙᔨᐦᑎᐦᒃ ᒫᓐᐦ ᓂᐲᔨᐤ ᐋ ᐐᐦ ᒥᓂᐦᒀᑦ᙮ ᑳ ᒥᔮᑭᓂᐎᒡᐦ, ᓂᒥ ᐅᐦᒋ ᒌ ᒥᓂᐦᒀᐤ, ᐋᑳ ᐅᐦᒋ ᒌ ᐊᑯᐦᑎᐦᒃ᙮ ᒥᒄ ᑳ ᒌ ᒫᑐᑦ ᒫᓐᐦ᙮ ᐋᔪᐎᒄ ᑮᑆ ᐊᓂᔮ ᐋ ᑳᐙᑎᒥᐦᒋᐦᑖᑦ ᐅᑯᐦᑎᔥᑯᔨ᙮ ᐋᑯᑖ ᑳ ᐃᓯᓈᑯᓯᑦ᙮

ᒑᒃ ᒫᒃ ᑳ ᐃᑎᑯᑦ ᐊᓂᔮᔨᐤᐦ ᐙᒥᔥᑎᑯᔒᐤᐦ, ᐊᑳᐐ ᒋᐱᐦᒌᐦ᙮ ᒨᔥ ᒑ ᐱᒧᐦᑖᔨᓐ᙮ ᐊᑳᐐ ᒋᐱᐦᒌᐦ ᑭᔮ ᐋ ᑎᐱᔅᑳᒡ᙮ ᐹᒋ ᑎᑯᔑᓂᔨᓈ ᐋ ᑎᐱᔅᑳᒡ ᓈᑖ ᐊᑳᒥᐦᒡ, ᒌ ᐃᑎᑰ᙮ ᐅᑖ ᐋᔔᑭᑳᒻ, ᐋᑯᑖ ᑳ ᐐᒋᔮᐦᒡ᙮ ᓈᑖ ᐋᔥᑎᐦᑖᑳᒻ ᑳ ᐃᑎᐦᐅᔮᑭᓂᐎᑦ, ᑳ ᒋᔅᑭᒥᐦᐅᔮᑭᓂᐎᑦ᙮ ᑳ ᐃᑎᑯᑦ, ᐹᒋ ᑎᑯᔑᓂᔨᓈ ᒫᒀᒡ ᐋ ᑎᐱᔅᑳᒡ, ᒨᔥ ᐙᔥ ᒋᑭ ᓈᓂᑐᐙᐱᒥᑎᓐ᙮ ᒑ ᑰᑐᐙᔨᓐ ᓈᑖ ᐊᑳᒥᐦᒡ᙮ ᒑ ᒋᔅᒑᔨᒥᑖᓐ ᓈᑖ ᐋ ᐃᐦᑖᔨᓐ᙮ ᒑ ᓈᑎᐦᐆᑯᔨᓐ, ᒌ ᐃᑎᑰ᙮

ᑖᑆ ᒫᒃ ᑮᑆ ᑳ ᐃᐦᑎᒃ᙮ ᔖᔥ ᑳ ᐊᐅᑳᔨᒡ ᑳ ᑎᑯᔑᐦᒃ, ᑭᔮ ᒫᒃ ᑳ ᐊᑎ ᐙᐱᓂᔨᒀ᙮ ᑖᐹ ᓂᒋᔅᒑᔨᒫᐤ᙮ ᒥᒄ ᐋ ᒌ ᐱᒧᐦᑖᑦ ᓈᑖ ᐋ ᒥᐦᒋᐦᑖᐙᔮᔨᒡ ᐋ ᒌ ᐃᑐᐦᑖᑦ᙮ ᑳ ᐹᑖᐙᑦ ᐊᓂᔮ ᐅᓂᑐᐦᑯᔨᓂᒥᔨᐤᐦ᙮ ᐋᔪᐎᑯᓐᐦ ᒫᒃ ᐊᓂᔮᐦ ᑳ ᐐᒋᐦᐄᑯᔨᒡᐦ ᐊᐙᔨᐤᐦ, ᐊᓂᔮᐦ ᓂᑐᐦᑯᔨᓐᐦ ᑳ ᐹᑖᑭᓂᐎᔨᒡᐦ ᐊᓂᔮᐦ ᐅᓂᑐᐦᑯᔨᓂᒻᐦ᙮

ᒑᒃ ᑳ ᐊᑎ ᐱᐳᓂᔨᒡ, ᐹᑎᔥ ᑳ ᐊᑎ ᒫᒀᐱᐳᓂᔨᒡ, ᐄᔮᒄ ᑳ ᐹᒋ ᒧᐙᐱᑎᐦᐋᑭᓂᐎᑦ᙮ ᐋᑯᑦ ᒫᒃ ᒌ ᐅᐦᒋ ᐅᐦᐱᐦᐅᒋᒑ ᐅᑎᐦ, ᐅᑎᐦ ᑮᑆ ᕛᕐᑦ ᒞᕐᒡ ᑳ ᐹᒋ ᐃᑑᑎᐦᐋᑭᓂᐎᑦ, ᐋᐅᒄ ᐊᓐ ᐙᒥᔥᑎᑯᔒᐤ᙮ ᔮᔨᑖ ᑮᑆ ᑳ ᐐᐦᑎᓱᒫᑭᓂᐎᑦ᙮ ᒨᔥ ᑳ ᐃᑖᑭᓂᐎᑦ ᑳ ᐹᔨᑯᔑᑦ᙮ ᑳ ᐹᔨᑯᔑᑦ ᒌ ᐃᑖᑭᓂᐤ᙮ ᑖᐹ ᓂᒋᔅᒑᔨᒫᐤ ᐙᒋᐦᒡ ᑳ ᐃᓯᓂᐦᑳᓱᑦ ᐊᓂᔮ ᑮᑆ ᐋ ᐙᒥᔥᑎᑯᔒᐅᓂᐦᑳᓱᑦ᙮

ᑳ ᒌ ᓂᑭᒧᑦ᙮ ᒑᒃ ᓈᔥᒡ ᑳ ᑭᔅᒋᐦᐅᑦ ᐋ ᐄᔨᔨᐅᓂᑭᒧᑦ᙮ ᐋᐃᐦ ᑳ ᒌ ᓂᑭᒧᐙᑦ, ᐊᒋᒧᔥᐦ ᑳ ᒌ ᓂᑭᒧᐦᐙᑦ᙮ ᑳ ᒌ ᐄᔨᔨᐅᓂᑭᒧᑦ ᒫᓐᐦ᙮ ᐊᓂᑖ ᑮᑆ ᐊᐙᔥᐦ ᐋ ᓂᑐᐙᐱᒫᑦ ᐋ ᐋᐦᑯᓯᔨᒡᐦ ᐋ ᐐᑎᐱᒫᑦ᙮ ᑳ ᒌ ᓂᑭᒧᑦ ᒫᓐᐦ᙮ ᓈᔥᒡ ᐋ ᒌ ᑭᔅᒋᐦᐅᑦ ᐋ ᐄᔨᔨᐅᓂᑭᒧᑦ᙮ ᒌ ᑭᑎ ᒋᔅᑯᑎᒧᐙᒋᒑᓂᒌ ᐊᓂᒌ ᑮᑆ ᕚᐃᓕᑦ, ᐊᓐ ᒫᒃ ᕕᓨᕌ᙮ ᒌ ᑭᑎ ᒋᔅᑯᑎᒧᐙᒋᒑᓂᒌ ᐊᓂᔮᔨᐤ ᐙᒋᐦᒡ ᐋ ᐃᑣᒥᑭᓂᔨᒡᐦ ᐊᓂᔮᔨᐤᐦ ᑮᑆ ᐊᐙᔥ ᓂᑭᒧᓂᔥᐦ᙮ ᓂᒑᒥᔥ ᑳ ᒋᒫᔨᐙᔑᑦ ᑳ ᒌ ᐃᑣᑦ ᒫᓐᐦ ᐋ ᓂᑭᒧᑦ, ᐋ ᓂᑭᒧᐦᐙᑦ ᐊᓂᔮᐦ᙮ ᓈᔥᒡ ᐋ ᒌ ᑭᔅᒋᐦᐅᐙᒡ ᑭᔮ, ᑳ ᒌ ᓂᑭᒧᐙᒡ ᐊᓂᔮᐦ ᐅᓂᑭᒧᓂᔨᐤ᙮ ᑳ ᒌ ᐃᑣᑦ ᐊᓂᔮᔨᐤ ᐋ ᓂᓂᑭᒧᑦ, ᑳ ᒌ ᓂᑭᒧᐙᑦ ᐊᓂᔮᔨᐤ᙮

ᑳ ᒌ ᐹᒋ ᐲᐦᑎᒑᑦ ᒫᓐᐦ ᓃᒋᓈᐦᒡ, ᒫᒀᒡ ᑮᑆ ᑳ ᐋᐦᑯᓯᑦ᙮ ᐋᔥᒄ ᐙᔥ ᒌ ᐱᒫᑎᓰᐤ ᐊᓂᔮ ᓅᐦᑯᒻ᙮ ᑳ ᒌ ᓂᑭᒧᑦ ᒫᓐᐦ᙮ ᑳ ᒌ ᓂᑭᒧᐙᑦ ᐊᓂᑦ ᓵᐃᒥᓐᐦ ᐋ ᐃᐦᑖᔨᒡᐦ᙮ ᐋᔪᐎᑯᓐᐦ ᐊᓂᔮᐦ ᐊᐙᔥ ᓂᑭᒧᓂᔥᐦ᙮ ᑳ ᒌ ᐊᑎ ᐄᔨᔨᐅᓂᑭᒧᑦ ᑭᔮ᙮ ᑳ ᒌ ᐃᐦᑎᒃ ᐊᓂᔮᔨᐤ᙮ ᑖᐹ ᓂᒋᔅᒑᔨᒫᐤ ᒫᒃ᙮ ᐋᔪᐎᒀᓈ ᒫᒃ ᒫᐦᒋᒡ ᐊᓂᔮ ᑳ ᐊᑎ᙮ ᔖᔥ ᒫᒃ ᓂᒌ ᐹᐦᑖᓐ ᔖᔥ ᐋᑳ ᐅᐦᒋ ᐃᐦᑖᑦ, ᐋᐅᒄ ᐊᓂᔮ ᐙᒥᔥᑎᑯᔒᐤ᙮ ᑮᑆ ᑳ ᒋᔅᒑᔨᒥᒃ ᑳ ᐃᓯᓂᐦᑳᓱᑦ᙮ ᒥᒄ ᑖᐹ ᓂᐐᐦ ᐐᐦᐋᐤ ᐱᑎᒫ᙮ ᑖᐹ ᓂᒑᔥᑎᓈᐦᐅᐙᓐ ᑖᓐ ᑳ ᐃᓯᓂᐦᑳᓱᑦ᙮ ᐋᔪᐎᒄ ᐙᐦᒋ ᐋᑳ ᐐᐦ ᐐᐦᐄᒃ, ᑳ ᐹᔨᑯᔑᑦ ᑳ ᐃᔑᓂᐦᑳᑖᑭᓂᐎᑦ᙮

 

 

Share Button

Comments are closed.