ᑳ ᒌ ᓂᑑᐦᐅᔮᐦᒡ ᓅᐦᑖᐐ

Share Button

ᐃᓛᐃᓵ ᑆᐱᔥ ᐌᑉ ᐋ ᒌ ᑎᐹᒋᒧᑦ, ᒋᓵᓰᐲ
ᐱᕌᔨᓐ ᐌᑉ ᐋ ᒌ ᐃᑣᔥᑎᒫᑎᐦᒃ ᑭᔮ ᐋ ᒌ ᒥᓯᓂᐦᐊᐦᒃ

ᐋᐃ ᒀ ᐊᓐ ᑳ ᐐᐦ ᑎᐹᒋᒧᔮᓐ ᐊᓂᔮ ᑮᑆ ᓅᐦᑖᐐ ᒨᔥ ᐋ ᒌ ᐐᒑᐅᒄ, ᐋ ᒌ ᐐᒋᐦᐄᒃ ᐋ ᓂᑑᐦᐅᑦ᙮ ᐋᑳ ᐅᐦᒋ ᐃᐦᑖᔨᒡᐦ, ᐋᔥᒄ ᐋᑳ ᐅᐦᒋ ᒌ ᓂᑑᐦᐅᒡ ᐊᓂᒌ ᓈᐹᔑᔑᒡ, ᐊᓂᔮᐦ ᑮᑆ ᐅᑯᓯᔅᐦ᙮ ᒥᓯᐙ ᐙᔥ ᒌ ᐊᐙᔑᔒᐅᐎᒡ ᓃᔨ ᐋ ᐃᐦᑎᔮᓐ᙮ ᓃᔨ ᒨᔥ ᐋ ᒌ ᐃᔑᑦ ᒑ ᐐᒋᐦᐄᒃ ᑮᑆ ᐋ ᐊᑎ ᐃᐦᑑᑎᐦᒃ ᐊᓐ ᑳ ᐃᑎ ᐃᔅᐱᑎᓯᔮᓐ ᒑ ᒌ ᐐᒋᐦᐄᒃ᙮ ᑖᐹ ᓂᒋᔅᒑᔨᐦᑖᓐ ᑖᓐ ᑳ ᐃᐦᑐᐳᓍᓯᔮᓐ ᐅᔥᑭᒡ ᑳ ᐐᒑᐅᒄ ᓅᐦᑖᐐ ᐊᓂᔮ ᐋ ᓂᑑᐦᐅᑦ᙮

ᐊᓐ ᓃᔥᑎᒻ ᑳ ᒌ ᐃᐦᑎᔮᐦᒡ ᐋ ᑎᒀᒋᐦᒡ᙮ ᐊᓂᑖ ᑮᑆ ᐋᐦᒋᑯᓂᑭᐦᐱᐦᒡ ᑳ ᒌ ᐐᒋᔮᐦᒡ᙮ ᐋᑯᑖ ᐙᔥ ᐊᓂᑖ ᒨᔥ ᑳ ᐃᐦᑖᔮᐦᒡ ᐊᓂᑖ ᐋᐦᒋᑯᓂᑭᐦᐱᐦᒡ᙮ ᐋ ᐱᒥᔥᑳᔮᐦᒡ ᐊᓂᑖ ᐋ ᐃᔥᒋᒫᔮᐦᒡ, ᒥᒄ ᑮᑆ ᐋ ᐱᒥᔥᑳᔮᐦᒡ᙮ ᑭᔮ ᒫᒃ ᓂᔮᓂᑯᑐᓐᐦ ᒥᒄ ᓂᒌ ᓃᔓᐳᔮᔑᓈᓐ ᓅᐦᑖᐐ, ᐋᑳ ᐅᐦᒋ ᒥᔪᐱᒫᑎᓰᑦ ᐊᓂᔮ ᓂᑳᐐ ᐊᓂᑖ ᐋ ᐃᔥᒋᔮᒫᐦᒡ, ᐊᓂᑖ ᑮᑆ ᐋ ᐃᔅᐱᓯᓈᑯᐦᒡ ᐊᓂᑖ ᐋᐦᒋᑯᓂᑭᐦᑉ᙮ ᒥᒄ ᐅᓵ ᐋ ᒌ ᓃᔓᐳᔮᔑᔮᐦᒡ᙮ ᑭᔮ ᐋ ᐱᒫᔑᔮᐦᒡ ᓈᐦᐄᑎᐦᒡᐦ᙮

ᐋᐅᒄ ᒫᒃ ᐊᓐ ᐋ ᐊᑎ ᑎᒀᒋᐦᒡ ᑮᑆ, ᐋᐅᒄ ᐙᔥ ᐊᓐ ᓈᔥᒡ ᑳ ᐐᐦ ᒋᔓᐙᔨᒫᑭᓂᐎᑦ ᐊᓐ ᐋᐦᒋᒄ᙮ ᒥᓯᐙ ᑳ ᐃᑖᐱᒋᐦᐋᑭᓂᐎᑦ ᐊᓐ ᐋᐦᒋᒄ᙮ ᐋ ᐅᒥᔅᒋᓯᓈᓂᐎᒡ ᑭᔮ ᐋ ᒧᐙᑭᓂᐎᑦ ᑭᔮ ᐊᓐ ᐱᒦ ᐋ ᑭᓄᐙᔨᐦᑖᑭᓂᐎᒡ, ᐊᓐ ᑮᑆ ᐋᐦᒋᑯᐱᒦ᙮ ᑖᐹ ᓈᔥᒡ ᐅᐦᒋ ᐙᔪᒋᐦᑖᑭᓂᐤ ᐊᓐ ᐙᒥᔥᑎᑯᔒᐤ ᐱᒦ ᑮᑆ, ᐊᓐ ᑮᑆ ᒑ ᒌ ᐋᐱᒋᐦᑖᑭᓂᐎᒡ ᐋ ᐋᐃᐦᑯᓈᐦᒑᓂᐎᒡ ᑭᔮ ᒫᒃ ᐋ ᐊᑯᐦᒋᒧᓈᓂᐎᒡ ᑮᑆ ᒦᒋᒻ ᐋ ᒦᒋᓈᓂᐎᒡ ᐋᑳ ᐱᒦᐅᒡ᙮ ᐋᐅᒄ ᐊᓐ ᓈᔥᒡ ᐙᐦᒋ ᒌ ᐐᐦ ᒋᔓᐙᔨᒫᑭᓂᐎᑦ ᐊᓐ ᐋᐦᒋᒄ᙮ ᑭᔮ ᐊᓂᒌ ᐊᑎᒧᒡ ᐋ ᔑᒫᑭᓂᐎᒡ᙮ ᐋᔪᐎᒄ ᐙᔥ ᐊᓂᔮᐦ ᓈᔥᒡ ᑳ ᒋᔑᐎᔥᑳᑯᒡ ᐊᓂᔮᐦ ᐋᐦᒋᒄ ᐱᒦᐦ ᐋ ᐋᐱᒋᐦᑖᑭᐦᐋᑭᓂᐎᒡ, ᐋᑳ ᑮᑆ ᐅᐦᒋ ᑎᑭᔂᑭᓂᐎᔨᒡᐦ, ᐋ ᒋᑭᔅᒋᓯᔨᒡᐦ ᐋ ᒧᐙᒡ᙮

ᐋᒄ ᐊᓂᑦ ᑳ ᒌ ᐐᒋᔮᐦᒡ ᐊᓂᑦ ᑳ ᒌ ᓅᒋᐱᔮᓱᐙᓂᐎᒡ ᐊᓂᑦ ᐋ ᐐᐙᒡ ᐊᓐ ᐋᐦᒋᑯᓂᑭᐦᑉ ᐋᑯᑦ ᑳ ᒌ ᐐᒋᔮᐦᒡ᙮ ᐱᔮᓯᐅᒡ ᑳ ᒌ ᐱᒦᐦᑭᐙᑭᓂᐎᒡ᙮ ᑳ ᒌ ᔒᐅᐦᐋᑭᓂᐎᒡ ᑭᔮ᙮ ᐊᓂᑦ ᐙᐅᐎᔮᐦᑖᑭᓂᐦᒡ ᑳ ᒌ ᐲᑎᐦᐅᐙᑭᓂᐎᒡ᙮ ᑭᔮ ᒫᒃ ᐊᓐ ᐋ ᐹᓯᑭᓂᐎᒡ ᒦᒋᒻ, ᐋ ᓂᒫᔥᑖᑯᐦᒑᓂᐎᒡ ᑮᑆ᙮ ᐋᒄ ᐊᓂᒌ ᐱᔥᒡ ᓂᔅᑭᒡ ᑳ ᒌ ᐃᐦᑑᑐᐙᑭᓂᐎᒡ ᐋ ᔒᐅᐦᐋᑭᓂᐎᒡ, ᔒᐅᐦᑖᑭᓐ ᐋ ᐋᐱᒋᐦᑖᑭᓂᐎᒡ, ᐊᓂᑦ ᐋ ᐲᑎᐦᐅᐙᑭᓂᐎᒡ ᐙᐅᐎᔮᐦᑖᑭᓂᐦᒡ᙮

ᐋᑯᑦ ᒫᒃ ᐊᓐ ᑳ ᒌ ᐃᐦᑖᓂᐎᒡ ᓈᐅᔥ᙮ ᐹᑎᔥ ᒫᒃ ᐋᑳ ᐊᑎ ᐃᐦᑖᑣᐤᐦ ᐊᓂᒡ ᓂᔅᑭᒡ ᑭᔮ ᐊᑳ ᐹᒥᐦᔮᑣᐤᐦ, ᔖᔥ ᓂᔮᓂᑯᑐᓐᐦ ᒌ ᐙᔅᑳᔮᔅᑭᑎᓐ ᐊᓂᑦ ᐋ ᒌ ᐐᒋᔮᐦᒡ ᐋ ᐐᐙᒡ᙮ ᐄᔮᒄ ᑳ ᒌ ᑯᔅᐱᐦᐊᒫᐦᒡ᙮ ᐊᓂᑖ ᑳ ᒌ ᑯᔅᐱᐦᐊᒫᐦᒡ ᑮᑆ ᐊᓂᑖ ᒥᔥᑎᑯᒡ ᐋ ᐃᐦᑖᒡ᙮ ᑖᐹ ᐃᐦᑖᐅᒡ ᒥᔥᑎᑯᒡ ᐊᓂᑦ ᓈᔥᑏᒡ ᐊᓂᑦ ᑮᑆ ᐋ ᐐᒋᓈᓂᐎᒡ ᐊᓂᑦ ᐋᐦᒋᑯᓂᑭᐦᑉ ᐋ ᐐᐙᒡ᙮ ᑖᐹ ᓈᔥᑏᒡ ᐃᐦᑖᐅᒡ ᒥᔥᑎᑯᒡ᙮ ᒥᒄ ᓃᐱᓰᐦ ᐃᐦᑎᑯᓐᐦ᙮

ᐋᑯᑦ ᒫᒃ ᐊᓂᑦ ᑳ ᒌ ᑯᔅᐱᐦᐊᒫᐦᒡ ᑮᑆ, ᐊᓂᑖ ᓰᐲᐦᒡ ᑳ ᒌ ᑯᔅᐱᐦᐊᒫᐦᒡ, ᒥᔥᑎᑯᒡ ᐋ ᐃᐦᑖᒡ ᑳ ᒌ ᐐᒋᔮᐦᒡ᙮ ᐋᑯᑦ ᒫᒃ ᑳ ᒌ ᐊᑎ ᑰᓂᐎᒡ ᑮᑆ, ᑳ ᒌ ᒥᔅᐳᐦᒡ, ᑭᔮ ᐋᐦᒸᔮ ᒥᔥᑭᐎᑎᐦᒡ, ᑳ ᒌ ᐃᔑᑦ ᐊᓂᔮ ᓅᐦᑖᐐ, ᐹᒋ ᐐᒑᐤᐦ, ᑳ ᒌ ᐃᔑᑦ᙮ ᐊᓂᑖ ᐄᔑ ᓈᓯᐹᐱᔨᑖᐤ, ᑳ ᒌ ᐃᔑᑦ᙮ ᐊᑎᒧᒡ ᑮᑆ ᑳ ᒌ ᐋᐱᒋᐦᐄᒋᐦᒡᐦ ᒫᓐᐦ᙮ ᐊᓂᑖ ᐄᔑ ᓈᓯᐹᐱᔨᑖᐤ ᑳ ᒌ ᐃᔑᑦ ᒫᓐᐦ, ᒑ ᓂᑐᐙᐦᒋᒀᔨᐦᒄ, ᐋᐦᒋᒄ ᒑ ᓈᓂᑐᐙᐱᒥᐦᒄ ᑳ ᒌ ᐃᔑᑦ ᒫᓐᐦ᙮ ᔖᔥ ᑮᑆ ᐋ ᑰᓂᐎᒡ ᐊᓐ ᐊᔅᒌ, ᒥᒄ ᐋᑳ ᒥᔥᑭᐎᑎᐦᒡ ᓂᐲ ᑮᑆ᙮ ᑭᔮ ᐊᓂᑖ ᐐᓂᐹᑯᐦᒡ ᐋᐦᒸᔮ ᒥᔥᑭᐎᑎᐦᒡ᙮ ᑳ ᒌ ᓈᓯᐹᐱᔨᔮᐦᒡ ᑮᑆ ᐊᑎᒧᒡ ᐋ ᐋᐱᒋᐦᐄᒋᐦᒡᐦ᙮ ᑖᐹ ᐙᐦᔨᐤ ᓂᐅᐦᒋ ᐐᒋᓈᓐ ᐊᓐ ᑮᑆ ᒥᒄ ᐋ ᐃᔅᑯᑳᐳᐎᒡ ᒥᔥᑎᑯᒡ ᐊᓂᑖ ᐐᓂᐹᑯᐦᒡ, ᐋᑯᑖ ᑳ ᒌ ᐐᒋᔮᐦᒡ᙮ ᒫᐦᑮᐦ ᐱᑎᒫ ᑳ ᒌ ᐋᐱᒋᐦᑖᔮᐦᒡ᙮ ᐋᐅᒄ ᒫᒃ ᑳ ᒌ ᓈᓯᐹᐱᔨᔮᐦᒡ, ᑳ ᒌ ᐐᒑᐅᒄ ᓅᑖᐐ, ᐆᑦ ᑮᑆ ᐋ ᑖᐦᒋᔥᑖᔮᐦᒡ, ᐊᓐ ᑮᑆ ᒑ ᐹᒥᔥᑳᐙᒑᔮᐦᒡ ᐆᑦ, ᐋᐅᒄ ᑳ ᒌ ᑖᐦᒋᔥᑖᔮᐦᒡ᙮ ᑭᔮ ᒫᒃ ᓂᔮᓂᑯᑐᓐᐦ ᑳ ᒌ ᓂᑭᑎᒫᐦᒡ ᐊᓐ ᐆᑦ ᐊᓂᑖ ᐋᑯᑖ ᑳ ᒌ ᐊᔥᑖᒡ᙮ ᒑᒃ ᒫᒃ ᑳ ᒌ ᒧᔖᐅᐦᐊᒫᐦᒡ᙮ ᑳ ᒌ ᒫᑯᐱᑖᑦ ᐊᓂᔮᐦ ᐊᑎᒽᐦ, ᐊᓂᔮᐦ ᑮᑆ ᓂᑖᒥᓈᓐᐦ ᓅᐦᑖᐐ ᐊᓂᑦ ᑮᑆ ᐊᓂᔮᔨᐤ ᐋ ᐅᐦᒋ ᒧᔖᐅᐦᐊᒧᒋᐦᑦ᙮ ᑳ ᒌ ᐊᑎ ᒧᔖᐅᐦᐊᒫᐦᒡ ᒫᓐᐦ᙮ ᑳ ᒌ ᓃᔥᑖᒧᐦᒑᔮᓐ, ᑳ ᒌ ᑎᑯᐦᐊᐦᒃ ᓅᐦᑖᐐ᙮ ᐊᓂᑖ ᑮᑆ ᐋᑳ ᔫᑎᐦᒡᐦ, ᐊᓐ ᑮᑆ ᐋ ᐃᔻᔥᑎᐦᒡ, ᐋᐅᒄ ᐊᓐ ᑳ ᒌ ᐃᐦᑎᔮᐦᒡ ᒫᓐᐦ᙮

ᓂᑯᑐᓐ ᒫᓐᐦ ᓈᔥᒡ ᒥᐦᒑᑐ ᐋ ᐹᒋ ᓅᑯᓯᒡ ᒫᓐᐦ ᐋᐦᒋᑯᒡ᙮ ᓂᔮᓂᑯᑐᓐᐦ ᒫᓐᐦ ᐋᑳ ᒌ ᒑᔥᑎᐦᐅᐙᑦ ᒫᓐᐦ ᓅᐦᑖᐐ ᒑ ᒌ ᐹᔅᒋᐦᐅᐙᑦ ᐊᓂᔮᐦ ᐋᐦᒋᒄᐦ ᐊᓂᔮ ᑮᑆ ᐋ ᐹᒋ ᓅᑯᓯᑦ ᐊᓂᑖ ᓂᐲᐦᒡ᙮ ᒀᑎᒃ ᐆ, ᓅᐦᑖ ᓈᔥᑖᑆ ᐙᔥ ᐆ ᓂᑯᔥᑖᐤ ᐊᓐ ᐋᐦᒋᒄ ᐋ ᐹᒋ ᓅᑯᓯᑦ᙮ ᒀᔑᑦ, ᑖᓐ ᒑ ᐃᐦᑐᑖᔅᒃ᙮ ᑖᐹ ᒋᑭ ᐱᒫᔨᒥᑯᓂᐤ, ᓂᑎᒄ᙮ ᑖᐹ ᐱᒫᔨᒫᐤ ᐊᐙᔨᐤᐦ, ᓂᑎᒄ᙮ ᐋᔥᒄ ᑮᑆ ᓂᒌ ᐊᐙᔑᔒᐅᓈᒋᒑ ᐊᓐ ᑳ ᐃᐦᑎᔮᐦᒡ ᐊᓐ ᑮᑆ ᐙᐦᒋ ᒌ ᐃᐦᑎᔮᓐ ᓈᔥᒡ ᐋ ᒌ ᑯᔥᑎᒃ ᐊᓐ ᐋᐦᒋᒄ ᐋ ᐹᒋ ᓅᑯᓯᑦ ᐊᓂᑖ ᓂᐲᐦᒡ᙮ ᑳ ᒌ ᐃᐦᑎᔮᐦᒡ ᒫᒃ ᐊᓐ᙮

ᑳ ᒌ ᓂᐱᐦᐋᑦ ᑮᑆ ᒫᓐᐦ ᐋᐦᒋᒄᐦ᙮ ᓂᔮᓂᑯᑐᓐᐦ ᐹᔨᒄ, ᓂᔮᓂᑯᑐᓐᐦ ᓃᔓ, ᑭᔮ ᓂᔥᑐ ᐋ ᓂᐱᐦᐋᑦ ᒫᓐᐦ᙮ ᑳ ᒌ ᐹᒋ ᓈᑎᑳᒫᐦᐊᒫᐦᒡ ᒦᓐ᙮ ᑖᐹ ᐙᐦᔨᐤ ᑮᑆ ᓂᐅᐦᒋ ᐄᔑᒋᒫᓈᓐ᙮ ᐹᔓᒡ ᒥᒄ ᐊᓂᑦ ᔑᔓᒡ, ᐋᑳ ᓈᔥᒡ ᐙᐦᔨᐤ᙮ ᒥᓂᔥᑎᒄᐦ ᐊᓂᑦ ᐋ ᐊᑯᑎᐦᒡᐦ, ᐋᑯᑦ ᑳ ᒌ ᐊᔨᑭᒧᔮᐦᒡ᙮ ᒥᒄ ᐙᔥ ᒌ ᐊᔨᑭᒧᓈᓂᐤ ᐋ ᓈᓂᑐᐙᐱᒫᑭᓂᐎᑦ ᐋᐦᒋᒄ᙮ ᑖᐹ ᐅᐦᒋ ᐱᒥᔥᑳᓂᐤ, ᒫᔻᑭᒥᒡᐦ ᑮᑆ᙮ ᑳ ᒌ ᓈᑎᑳᒫᐦᐅᔨᒋᐦᒡ ᐊᓂᒌ ᐋᐦᒋᑯᒡ, ᐊᓂᔮ ᑮᑆ ᓅᐦᑖᐐ ᑳ ᓂᐱᐦᐋᑦ᙮ ᑳ ᒌ ᒌᐙᐱᔨᔮᐦᒡ᙮ ᑳ ᒌ ᒌᐙᐱᔨᐦᐄᒋᐦᒡ᙮ ᐋ ᒋᓍᔅᑯᓯᑦ ᑮᑆ ᐅᑖᐹᓈᔅᒄ, ᐊᔨᔥᒌᒫᐤ ᐅᑖᐹᓈᔅᒄ ᐃᔑᓂᐦᑳᑖᑭᓂᐤ᙮ ᐋᔪᐎᒄ ᒫᒃ ᑳ ᒌ ᐋᐱᒋᐦᐄᒥᒋᐦᒡᐦ ᒫᓐᐦ᙮ ᑳ ᒌ ᒌᐙᐱᔨᐦᐄᒋᐦᒡ ᐊᓂᒌ ᐋᐦᒋᑯᒡ, ᐊᓂᔮᐦ ᑮᑆ ᓅᐦᑖᐐ ᑳ ᓂᐱᐦᐋᑦ᙮ ᑳ ᒌ ᐃᔑᑦ ᒫᓐᐦ, ᒑᒀᔨᐤ ᐙᐦᒋ ᓈᔥᒡ ᒌ ᑯᔥᑎᑣᐤ ᐊᓂᒌ ᐋᐦᒋᑯᒡ? ᑳ ᒌ ᐃᔑᑦ ᒫᓐᐦ᙮ ᒀᑎᒃ ᐆ, ᒑ ᐹᒋ ᑯᑎᐱᐦᐅᔨᒥᐦᒡ ᑮᑆ ᓂᒌ ᐃᑖᔨᐦᑖᓐ, ᓂᑎᑖᐤ᙮ ᔨᑆᐦᑳᐦ, ᓂᑎᒄ᙮ ᑖᐹ ᐃᐦᑑᑐᐙᐤ ᐊᐙᔨᐤᐦ ᐋᐦᒋᒄ, ᓂᑎᒄ᙮

ᐋᑯᑦ ᒫᒃ ᑳ ᒌ ᐐᒋᔮᐦᒡ ᒫᓐᐦ ᐊᓂᑦ᙮ ᑳ ᒌ ᒫᑎᓂᐙᑦ ᐊᓂᔮᐦ, ᐊᓂᔮ ᑮᑆ ᒥᓯᐙ ᐊᐙᓂᒌ ᐊᓂᑦ ᐋ ᐃᐦᑖᐦᒡ ᐊᓂᑦ ᐊᓂᒌ ᑮᑆ ᑳ ᒌ ᐐᒋᒥᒋᐦᒡ ᐊᐙᓂᒌ᙮ ᒥᓯᐙ ᑳ ᔑᒫᑭᓂᐎᒡ, ᑭᔮ ᒥᓯᐙ ᑳ ᒥᔮᑭᓂᐎᒡ ᐊᓂᔮᐦ ᐱᒦᐦ᙮ ᐋᒄ ᐊᓐ ᓂᑳᐐ, ᑳ ᒌ ᒥᔪᐦᑭᐙᑦ ᐊᓂᔮᐦ ᐋᐦᒋᑯᔮᓐᐦ᙮ ᑳ ᒌ ᐐᒋᐦᐄᒃ ᑮᑆ ᓂᔮᓂᑯᑐᓐᐦ᙮ ᑖᐹ ᓈᔥᒡ ᓂᐅᐦᒋ ᒋᔅᒌᐦᑐᐙᐤ ᒥᕌᔮ ᐋ ᐐᒋᒥᒋᐦᑦ ᐊᓂᑖ᙮ ᓂᑐᐦᑯᔨᓂᑭᒥᑯᐦᒡ ᐙᔥ ᒌ ᐃᐦᑖᐤ᙮ ᓈᐅᔥ ᒌ ᐃᐦᑖᐤ ᐊᓂᑖ ᓂᑐᐦᑯᔨᓂᑭᒥᑯᐦᒡ᙮ ᐋᐅᒄ ᐊᓐ ᒫᒀᒡ ᐋᐦᒸᔮ ᐅᐦᒋ ᐲᐦᑎᒑᔮᓐ ᒋᔅᑯᑎᒫᑑᑭᒥᑯᐦᒡ ᐊᓐ ᑮᑆ ᑳ ᐃᐦᑎᔮᐦᒡ᙮ ᒑᒃ ᒫᒃ ᑳ ᐅᔑᐦᑖᑭᓂᐎᒡ ᒥᐦᑐᑳᓐ ᐊᓂᑦ ᑮᑆ ᒑ ᐃᐦᑖᔮᐦᒡ ᒑ ᐱᐳᐦᒡ᙮ ᑳ ᒌ ᐅᔑᐦᑖᑭᓂᐎᒡ ᐊᓐ ᒥᐦᑐᑳᓐ᙮ ᐋᑯᑦ ᐊᔮᐱᒡ ᑳ ᒋᒥᑖᒡᐦ ᐊᓂᐦᐄ ᓂᒫᐦᑮᒥᓈᓐᐦ᙮ ᒥᒄ ᑳ ᒌ ᐃᔅᐱᔨᓈᓂᐎᒡ ᒫᓐᐦ ᐊᓂᑖ ᐋ ᒌᔑᑳᒡ ᐋ ᓂᑑᐅᔑᐦᑖᑭᓂᐎᒡ ᐊᓐ ᒥᐦᑐᑳᓐ᙮

ᑳ ᒌᔥᑖᑭᓂᐎᒡᐦ ᒫᒃ ᐊᓐ ᒥᐦᑐᑳᓐ᙮ ᑳ ᐃᐦᑎᒃ ᐙᔥ ᐊᓂᔮ ᓅᐦᑖᐐ, ᐋᔪᐎᒄ ᐊᓂᔮ ᑳ ᐄᔑ ᒋᔅᒑᔨᒥᒃ ᐊᓂᔮ ᓅᐦᑖᐐ ᐋ ᐃᐦᑎᒃ, ᓈᔥᒡ ᐋ ᒥᔻᔨᒡᐦ ᒥᐦᑦᐦ᙮ ᒌ ᐐᐳᔅᑳᐤ ᐙᔥ ᒨᔥ ᐊᓂᑖ, ᐊᓂᑦ ᑮᑆ ᒨᔥ ᐋ ᒌ ᐃᐦᑖᔮᐦᒡ ᐋ ᓈᑣᔮᔑᒡ ᐋ ᐃᔑᓂᐦᑳᑖᒡ᙮ ᒌ ᐐᐳᔅᑳᐤ ᐙᔥ᙮ ᒌ ᐐᐦᑖᐦᑖᑯᐱᓐ ᐊᓂᑖ ᐙᔥᑭᒡ᙮ ᓈᔥᒡ ᐋ ᒌ ᒥᔪᐦᑎᑳᒡᐦ ᒥᐦᑦᐦ᙮ ᐋᑯᑦ ᒫᒃ ᐊᓂᑦ ᐹᔓᒡ ᑳ ᒌ ᐐᒋᔮᐦᒡ᙮ ᐊᓂᒌ ᐋ ᒥᓂᑳᐳᐎᒡ ᒥᔥᑎᑯᒡ, ᐊᓂᒌ ᑮᑆ ᐋᑳ ᐅᐦᒋ ᐐᓱᒡ, ᐋᑯᑦ ᔮᔨᑖ ᑳ ᒌ ᐐᒋᔮᐦᒡ ᒫᓐᐦ᙮ ᐋ ᑎᐱᓂᐙᔅᒀᔮᒡ ᑮᑆ ᐋ ᐃᓈᓂᐎᒡ, ᐊᓂᑖ ᑮᑆ ᐋ ᐲᐅᐦᒡ᙮ ᒸᐦᒡ ᐋ ᑎᐱᓂᐙᒡ ᐋ ᐃᑖᔨᐦᑖᑯᐦᒡ, ᐋᑯᑦ ᔮᔨᑖ ᑳ ᒌ ᐐᒋᔮᐦᒡ᙮

ᐹᑎᒫ ᑮᑆ ᐄᔮᒄ ᑳ ᒋᔅᒑᔨᐦᑎᒫᓐ ᒑᒀᔨᐤ ᐊᓂᔮ ᐙᐦᒋ ᒌ ᐐᐦ ᐐᒋᑦ ᓅᐦᑖᐐ, ᑭᔮ ᐋᑳ ᔮᐅᓈᑯᐦᒡᐦ ᒥᐦᑦᐦ᙮ ᐱᔑᒄ ᐙᔥ ᐃᔅᒀᐅᒡ ᑳ ᓂᑯᐦᑖᒡ᙮ ᐱᔑᒄ ᐃᔅᒀᐅᒡ ᒌ ᐱᑯᐦᑖᐅᒡ ᐊᓂᔮᐦ ᒥᐦᑦᐦ᙮ ᑭᔮ ᐃᔥᒀᔑᔑᒡ, ᐋᑦ ᑮᑆ ᐊᐙᔑᔒᐅᐎᒡ, ᑳ ᒌ ᐐᒑᐙᒡ ᐅᑳᐅᐙᐤᐦ ᐋ ᓂᑯᐦᑖᔨᒡᐦ᙮ ᐊᔮᐱᒡ ᑳ ᒌ ᐹᑖᔑᒡ ᑭᔮ ᒥᐦᑦᐦ᙮ ᔖᔥ ᐊᓂᔮ ᑳ ᐄᔑ ᒋᔅᑯᑎᒧᐙᑭᓂᐎᒡ᙮ ᐋᐅᒄ ᒫᒃ ᐊᓐ ᑳ ᒌ ᐃᐦᑎᔮᓐ ᑮᑆ ᑭᔮ ᓃᔨ᙮

ᐋᐅᒄ ᒫᒃ ᐊᓐ ᒑᒃ ᑳ ᒌ ᐊᑎ ᑎᐦᑳᔮᒡ, ᓈᔥᒡ ᑳ ᒌ ᑎᐦᑳᔮᒡ᙮ ᐅᔥᑭᒡ ᑳ ᒌ ᐊᑎ ᐱᒀᐦᐄᐹᓂᐎᒡ, ᓈᔥᒡ ᐙᔥ ᐋ ᒌ ᒥᔪᓯᒡ ᐊᓂᒌ ᐃᐦᒑᔮᐦᒀᐅᒡ ᐃᔑᓂᐦᑳᑖᑭᓂᐎᐎᒡ᙮ ᐊᓂᒌ ᑮᑆ ᐋ ᐙᐦᑯᐎᒡ ᓂᒫᓯᒡ᙮ ᐋᐅᑯᓂᒡ ᐊᓂᒌ ᑳ ᒌ ᐐᐦ ᓂᐱᐦᐋᑭᓂᐎᒡ ᒫᓐᐦ, ᐃᐦᒑᔮᐦᒀᐅᒡ᙮ ᒥᓯᐙ ᑳ ᒌ ᒌᔥᑎᐦᐙᑦ ᐊᐙᓐ ᐊᓂᔮᔨᐤᐦ ᑮᑆ ᓂᒫᔅᐦ᙮ ᒥᓯᒑ ᑳ ᒌ ᒌᔥᑎᐦᐙᑦ᙮ ᓈᔥᒡ ᑳ ᒌ ᐐᒋᔅᑎᒡ ᐋ ᒫᓯᐙᓯᔨᒡ ᐋ ᒌ ᒌᔥᑎᐦᐙᑭᓂᐎᒡ᙮ ᐋᐅᒄ ᒫᒃ ᐊᓐ ᑳ ᒌ ᐊᑎ ᐱᐳᐦᒡ, ᑳ ᒌ ᑎᐦᑳᔮᒡ ᑭᔮ᙮ ᓈᔥᒡ ᑳ ᒌ ᐊᑎ ᑎᐦᑳᔮᒡ᙮ ᑳ ᒌ ᐃᔑᑦ ᐊᓂᔮ ᓅᐦᑖᐐ, ᐹᒋ ᐐᒑᐤᐦ, ᑳ ᒌ ᐃᔑᑦ ᒫᓐᐦ ᐊᓂᔮ ᐋ ᐱᒀᐦᐄᐹᑦ ᑮᑆ᙮ ᒑᒃ ᑳ ᐅᑎᐦᒋᐱᔨᔨᒡ ᒑ ᐱᒀᐦᐄᐹᑦ ᐊᓂᔮ ᐋ ᐊᑎ ᐃᔑᓈᑯᓂᔨᒡᐦ ᒑ ᒌ ᒧᓵᔅᑯᓈᓂᐎᔨᒡ, ᑳ ᒌ ᐱᒀᐦᐄᐹᔮᐦᒡ ᒫᓐᐦ᙮ ᑳ ᒌ ᐐᒋᐦᐄᒃ ᓅᐦᑖᐐ᙮ ᐅᓵ ᑮᑆ ᐊᓂᔮ ᐋ ᐃᑑᐦᑑᒄ ᒑᒀᔨᐤ ᑭᔮ ᒫᒃ ᐋ ᐅᑎᓈᐹᔮᓐ ᑮᑆ, ᐋᐅᒄ ᐊᓐ ᐅᓵ ᑳ ᒌ ᐊᑎ ᐃᐦᑎᔮᓐ ᒫᓐᐦ᙮

ᒑᒃ ᒫᒃ ᑳ ᐊᑎ ᒫᒀᐱᐳᐦᒡ ᑭᔮ ᓈᔥᒡ ᑳ ᒌ ᑎᐦᑳᔮᒡ᙮ ᓈᔥᒡ ᐙᔥ ᒧᔮᒻ ᐊᑎᑑ ᓈᔥᒡ ᐋ ᒌ ᑎᐦᑳᔮᒡ, ᐆ ᑮᑆ ᐋ ᐃᑖᔨᐦᑖᑯᐦᒡ ᐋ ᐱᐳᐦᒡ ᑳ ᐃᑖᔨᐦᑖᑯᐦᒡ᙮ ᓈᔥᒡ ᐋ ᒌ ᑎᐦᑳᔮᒡ᙮ ᑭᔮ ᓈᔥᒡ ᐋᑳ ᐅᐦᒋ ᐃᐦᑎᑯᐦᒡ ᒑ ᒌ ᒌᔔᐦᐆᐙᑭᓂᔮᐦᒡ ᒑᒀᓐ᙮ ᐊᒄ ᐊᓂᔮ ᑮᑆ ᐐ ᓅᐦᑯᒻ ᒑᔅᒌᐦᑑᒄ᙮ ᐋᐅᒄ ᐙᔥ ᑳ ᒌ ᐐᒋᒥᒃ᙮ ᑳ ᒌ ᒦᔨᑦ ᐙᐳᔓᔮᓐᐦ, ᐙᐳᔓᔮᓐᐦ ᑳ ᒌ ᐹᒋ ᒦᔨᑦ ᒑ ᐲᐙᔅᒑᐅᒡ᙮ ᑳ ᒌ ᒋᐦᒋᐱᔨᔮᐦᒡ ᓅᐦᑖᐐ, ᐊᑎᒧᒡ ᐋ ᐋᐱᒋᐦᐄᒋᐦᒡ᙮ ᓈᔥᒡ ᑳ ᒌ ᒥᔻᔨᐦᑎᒫᓐ ᒫᓐᐦ ᑳ ᒌ ᐱᒥᐱᔨᔮᐦᒡ᙮ ᓈᐅᔒᔥ ᑮᑆ ᑳ ᒌ ᐱᒥᐱᔨᔮᐦᒡ ᒫᓐᐦ᙮ ᒥᔥᑎᑯᐦᒡ ᐊᓂᑖ ᑳ ᒌ ᐱᒥᐱᔨᔮᐦᒡ᙮ ᑭᔮ ᐊᓂᐦᐄ ᓵᑭᐦᐄᑭᓐᐦ, ᓵᑭᐦᐄᑭᓐᐦ ᐋ ᐊᑎ ᐃᔥᑖᒡᐦ ᑳ ᒌ ᐊᑎ ᐱᒥᐱᔨᔮᐦᒡ ᒫᓐᐦ᙮ ᑳ ᒌ ᐹᐦᑑᒄ ᒫᓐᐦ ᓅᐦᑖᐐ ᐋ ᓂᑭᒧᑦ᙮ ᑳ ᒌ ᓂᑭᒧᑦ ᒫᓐᐦ ᒫᒀᒡ ᐋ ᐱᒥᐱᔨᐅᒋᐦᑦ᙮ ᒑᒀᔨᒋᒑ ᑮᑆ ᑳ ᓂᓂᑭᒧᐦᑖᑦ᙮ ᐋᔨᒋᒑ ᑮᑆ ᐊᓂᔮ ᐋ ᐊᑎ ᐃᐦᑎᒃ, ᐋᔨᒋᒑ ᐊᓂᔮ ᑭᔮ ᐊᓂᔮ ᐋ ᐊᑎ ᐃᔑᓂᐦᒃ ᐊᓂᑖ ᒌ ᓂᓂᑭᒧᐦᑖᒋᒑ᙮ ᓈᔥᒡ ᑳ ᒌ ᒥᔻᔨᐦᑎᒫᓐ ᒫᓐᐦ ᐋ ᐹᐦᑑᒄ ᓅᐦᑖᐐ ᐋ ᓂᓂᑭᒧᑦ ᑮᑆ᙮ ᑭ ᓂᓂᑭᒧᐙ ᐋ ᐃᐦᑎᒃ᙮ ᒥᑎᑐᓐ ᐋ ᒌ ᒋᔅᒑᔨᒥᒃ ᓈᔥᒡ ᐋ ᒥᔻᔨᐦᑎᐦᒃ ᐊᓂᔮ ᑮᑆ ᐋ ᐊᑎ ᐃᐦᑑᒋᐦᑦ᙮

ᐋᑯᑦ ᒫᒃ ᑳ ᒌ ᓈᑎᐦᐄᐹᔮᐦᒡ᙮ ᓈᔥᒡ ᑳ ᒌ ᔒᐦᑭᒋᔮᓐ ᒫᓐᐦ᙮ ᓈᔥᒡ ᑳ ᒌ ᑎᑎᒀᔅᒋᔮᓐ ᐊᔮᐱᒡ, ᐋᑎᔥ ᐙᐳᔓᔮᓐ ᒌ ᐲᐙᔅᒑᔮᓐ᙮ ᓈᔥᒡ ᑳ ᒌ ᔒᐦᑭᒋᔮᓐ᙮ ᑳ ᒌᔑ ᓈᑎᐦᐄᐹᔮᐦᒡ ᒫᒃ, ᑖᐹ ᒥᒄ ᐅᐦᒋ ᐹᔨᑯᐦᐄᐹᓯᐤ ᐊᓐ ᐊᐦᐄᐲ᙮ ᒌ ᒥᐦᒑᑐᐦᐄᐹᓯᐅᒡ ᐙᔥ ᐊᓂᒌ ᐊᐦᐄᐲᒡ᙮ ᑭᔮ ᒫᒃ ᐊᓂᒡ ᑯᑎᑭᒡ ᐊᐙᓂᒌ, ᐊᓂᒌ ᑮᑆ ᔖᔥ ᐋᑳ ᓈᔥᒡ ᐅᐦᒋ ᒌ ᐐᒋᐦᐄᓱᒡ ᑮᑆ, ᐋᔪᐎᑯᓐᐦ ᑳ ᐱᒦᐦᑰᒫᑦ ᓅᐦᑖᐐ ᐊᓂᔮᐦ ᐅᑎᐦᐄᐲᔨᐤᐦ᙮ ᐋ ᐱᑯᐦᐆᒫᑦ ᑮᑆ ᐊᓂᔮᐦ ᐅᑎᐦᐄᐲᔨᐤᐦ ᑭᔮ ᐋ ᓈᑎᐦᐄᐹᐙᑦ᙮ ᒥᒄ ᑳ ᒌ ᐹᑑᒋᐦᒡ ᐊᓂᔮᐦ ᐅᓂᒫᓯᒥᐙᐤᐦ, ᐋᔪᐎᒄ ᑳ ᐃᐦᑑᑐᐙᑦ ᐊᐙᔨᐤᐦ᙮

ᑳ ᒌ ᐃᔑᑦ ᒫᓐᐦ, ᐊᓐ ᑮᑆ ᑳ ᒌᔑ ᓈᓈᑎᐦᐄᐹᔮᐦᒡᐦ, ᓈᔥᒡ ᑳ ᒌ ᐱᑎᐦᐅᔮᔮᐦᒡ ᒫᓐᐦ, ᐊᑎᐦᑭᒫᑯᒡ ᑮᑆ᙮ ᑭᔮ ᒫᒃ ᓂᔮᓂᑯᑐᓐᐦ ᑰᑭᒫᔥ ᑳ ᒌ ᐱᑎᐦᐊᐦᒃ᙮ ᑳ ᒌ ᐃᔑᑦ ᓅᐦᑖᐐ, ᓈᑎᑳᔅᑯᑖᐤ, ᒑ ᑯᑐᐙᔨᐦᒄ ᐊᓂᑖ, ᑳ ᒌ ᐃᔑᑦ ᒫᓐᐦ᙮ ᒑ ᒥᓂᐦᒀᔨᐦᒄ, ᑳ ᒌ ᐃᔑᑦ ᒫᓐᐦ᙮ ᓈᔥᒡ ᑮᑆ ᒫᒀᒡ ᐋ ᔒᐦᑭᒋᔮᓐ᙮ ᓂᒥ ᓂᐅᐦᒋ ᐃᑖᐤ ᑮᑆ, ᓅᐦᑖ ᓈᔥᑖᑆ ᓂᔒᐦᑭᒋᓐ, ᒑ ᒌ ᐃᑎᒃ᙮ ᒥᒄ ᑳ ᒌ ᔒᐦᑭᒋᔮᓐ ᒫᓐᐦ᙮

—ᑳ ᒌ ᓈᑎᐦᐄᐹᔮᐦᒡ ᑮᑆ᙮ ᐋᒄ ᐊᓐ ᒫᒃ ᑳ ᒌ ᐃᑖᐱᒋᐦᐄᑦ ᓅᐦᑖᐐ ᐋ ᐅᑎᓈᐹᐅᒡ ᑮᑆ᙮ ᑭᔮ ᒫᒃ ᑳ ᒌ ᓈᑎᑳᔅᑯᔮᐦᒡ ᐊᓂᑖ ᒥᔥᑎᑯᒡ ᐋ ᐃᐦᑖᒡ᙮ ᓂᔮᓂᑯᑐᓐᐦ ᑮᑆ ᑖᐹ ᐅᐦᒋ ᐃᐦᑖᐅᒡ ᐊᓂᒌ ᒥᔥᑎᑯᒡ ᐋᑳ ᐅᐦᒋ ᐐᓱᒡ, ᐋ ᐐᐳᔅᑳᒡ ᐊᔮᐱᒡ ᐊᓂᑖ ᑳ ᒌ ᑰᑐᐙᔮᐦᒡ ᒫᓐᐦ᙮ ᓈᔥᒡ ᐋ ᒌ ᒥᔑᐦᑖᑦ ᒫᓐᐦ ᓅᐦᑖᐐ ᐃᔥᑯᑖᔨᐤ᙮ ᓈᔥᒡ ᐋ ᒌ ᒥᔻᔨᐦᑎᒫᓐ ᒫᓐᐦ, ᒫᒀᒡ ᑮᑆ ᓈᔥᒡ ᐋ ᔒᐦᑭᒋᔮᓐ᙮

ᑳ ᒌ ᐱᑳᐦᐋᑦ᙮ ᑳ ᒌ ᑎᐦᑯᓂᒫᐦᒡ ᑮᑆ ᓂᒫᓯᔅᒋᐦᒄ᙮ ᑳ ᒌ ᑎᐦᑯᓂᒫᐦᒡ ᐊᔥᒋᐦᑯᔥ᙮ ᐋᑯᑦ ᑳ ᒌ ᐱᑳᐦᐋᑦ ᐊᓂᔮᐦ ᓂᒫᔅᐦ᙮ ᐹᔨᒄ ᐊᓂᔮᐦ ᓂᒫᔅᐦ ᐋ ᒥᔑᑎᔑᔨᒡᐦ ᑮᑆ, ᒑ ᒨᐦᒄ ᑳ ᒌ ᐃᔑᑦ ᒫᓐᐦ᙮ ᓈᔥᒡ ᐋ ᒌ ᒥᔻᔨᐦᑎᒫᓐ ᐋᐅᒄ ᐊᓐ, ᐊᓂᔮ ᑮᑆ ᐋ ᐐᒑᐅᒄ ᓅᐦᑖᐐ᙮ ᑖᑭᓱᔨᒡᐦ ᑮᑆ, ᑳ ᒌ ᐹᒋ ᔑᒥᑦ᙮ ᔑᐦᑖᑯᓂᒡ ᑮᑆ ᐋ ᐃᐦᑖᑣᐤᐦ, ᐋᐅᑯᓂᒡ ᐙᔥ ᑳ ᐅᐎᔮᑭᓂᔮᐦᒡ᙮ ᐋᑯᑦ ᑳ ᐃᒀᐦᐄᒑᑦ ᒫᓐᐦ᙮ ᑳ ᒌ ᒦᒋᔮᐦᒡ ᐊᓐ ᒦᒋᒻ᙮ ᓈᔥᒡ ᐋ ᒌ ᒥᔻᔨᐦᑎᒫᓐ ᑭᔮ ᓈᔥᒡ ᐋ ᒌ ᐐᐦᑳᑭᒥᒡ ᐊᓐ ᒨᔥᑭᒦ᙮ ᐋᐅᒄ ᑳ ᒌ ᒥᓂᐦᒀᔮᐦᒡ ᒫᓐᐦ᙮ ᓈᔥᒡ ᐋ ᒌ ᐋᐹᓂᑯᔮᓐ᙮ ᐊᓐ ᑮᑆ ᓈᔥᒡ ᐊᔨᐦᒡ ᐋ ᒌ ᐃᑖᔨᐦᑎᒫᓐ᙮ ᒦᓐ ᐊᔥᑳᑳ ᓂᔒᐦᑭᒋᓈᐅᐙ ᑳ ᒌ ᐃᑖᔨᐦᑎᒫᓐ ᒫᓐᐦ᙮ ᑳ ᒌ ᐊᑎ ᐃᔮᔅᑯᐃᔮᐦᒡ ᒫᒃ ᒑ ᐊᑎ ᒌᐙᐱᔨᔮᐦᒡ, ᒥᓯᐙ ᑮᑆ ᒑᒀᓐ᙮ ᐋᑯᑦ ᑮᑆ ᑳ ᒌ ᓂᑭᑎᒫᐦᒡ ᐊᓐ ᐅᑎᓈᑭᓈᐲ᙮ ᑳ ᒌ ᐊᑎ ᒌᐙᐱᔨᔮᐦᒡ ᑮᑆ᙮ ᒦᓐ ᓈᐅᔥ ᐋ ᐱᒥᐱᔨᔮᐦᒡ, ᒦᓐ ᓈᔥᒡ ᑳ ᒌ ᐊᑎ ᔒᐦᑭᒋᔮᓐ ᒫᓐᐦ᙮ ᑳ ᒌ ᔒᐦᑭᒋᔮᓐ ᓈᐅᔥ ᑮᑆ ᐋ ᐱᒥᐱᔨᔮᐦᒡ᙮ ᓂᔮᓂᑯᑐᓐᐦ ᐙᔥ ᓂᒌ ᐃᔨᒥᐱᔨᓈᓐ ᒫᓐᐦ᙮ ᐋᐅᒄ ᐊᓐ ᒑᔅᒋᔮᓐ ᐊᓂᔮ ᐋ ᐄᔑ ᐐᒑᐅᒄ ᓅᐦᑖᐐ᙮

ᐊᓂᑖ ᐐ ᐋ ᐱᐳᓂᔨᒡ ᐊᓂᑖ ᐋ ᓂᑐᐙᐦᒋᒀᑦ, ᑖᐹ ᓂᐦᑖ ᓂᐅᐦᒋ ᐐᒑᐙᐤ᙮ ᑖᐹ ᓂᐦᑖ ᓂᐅᐦᒋ ᐐᒋᐦᐄᐙᓐ, ᐊᓂᔮ ᑮᑆ᙮ ᑯᑎᑭᒡ ᑮᑆ ᐊᐙᓂᒌ ᑳ ᐊᑎ ᐐᒋᒥᒋᐦᒡ, ᐊᓂᒌ ᑮᑆ ᓈᐹᐅᒡ ᑳ ᐊᑎ ᐃᐦᑖᒡ, ᐋᔪᐎᒄ ᐊᓂᔮᔨᐤ᙮ ᐋᒄ ᐊᓐ ᒫᒃ ᐋᔥᒄ ᐋ ᒌ ᐙᐦᑎᐦᒡ ᐊᓐ, ᐋᑳ ᓈᔥᒡ ᐋᔥᒄ ᐅᐦᒋ ᑎᐦᑳᔮᒡ, ᐋᔪᐎᒄ ᐙᐦᒋ ᒌ ᐐᒑᐅᒄ ᒫᓐᐦ᙮ ᑳ ᒌ ᒌᒥᒃ ᒫᓐᐦ ᓅᐦᑖᐐ ᐋ ᓂᑐᐙᐦᒋᑯᐦᐊᐦᒃ᙮ ᐋᐅᒄ ᒫᓐᐦ ᑳ ᒌ ᐃᐦᑎᔮᓐ ᒫᓐᐦ ᐋ ᐐᒑᐅᒄ ᓅᐦᑖᐐ ᒨᔥ᙮

ᒨᔥ ᒫᒃ ᐋᐅᒄ ᐊᓐ ᑳ ᐄᔑ ᒥᔻᔨᐦᑎᒫᓐ ᐋ ᐃᐦᑎᔮᓐ ᐊᓐ ᐋ ᓂᑑᐦᐅᔮᓐ, ᑭᔮ ᐋ ᓈᓂᑑᐦᔮᐙᔮᓐ᙮ ᑭᔮ ᐋ ᒋᔅᑐᐦᑖᔮᓐ ᐋ ᐹᔨᑯᐦᑖᔑᔮᓐ ᒥᒄ ᑮᑆ ᐋ ᐱᐹᒧᐦᑖᔮᓐ ᐋ ᓈᓂᑐᐙᐱᐦᑎᒫᓐ ᒑᒀᓐ, ᒦᒋᒻ ᑮᑆ ᑳ ᐃᐦᑎᔮᓐ᙮ ᑭᔮ ᒥᐦᒑᑣᐤ ᑳ ᒌ ᐃᓯᓈᑯᓯᔮᓐ ᑮᑆ ᐋ ᐹᑖᔮᓐ ᒑ ᒦᒋᔮᐦᒡ ᒦᒋᒻ᙮ ᒥᒄ ᒫᒃ ᓂᒥ ᓂᐅᐦᒋ ᐙᐱᐦᑖᓐ ᐊᓂᑖ ᓈᔥᒡ ᑮᑆ ᐊᓂᑖ ᐐᐦ ᒦᒋᓱᓈᓂᐤ ᑳ ᒌ ᐃᓈᓂᐎᒡ᙮ ᑳ ᒌ ᐃᑖᒋᒧᒡ ᑮᑆ ᐊᐙᓂᒌ᙮ ᑖᐹ ᓂᐅᐦᒋ ᐙᐱᐦᑖᓐ ᐋᐅᒄ ᐊᓐ᙮ ᒥᒄ ᑮᑆ ᐋ ᒑᐦᒋᔥᑭᐎᐦᒡ ᐋ ᐃᓈᓂᐎᒡ, ᒥᒄ ᒑᐦᒋᔥᒡ ᑮᑆ᙮ ᐋᒄ ᐊᓐ ᑮᑆ ᐐ ᐙᒥᔥᑎᑯᔒᐤ ᒦᒋᒻ, ᐋᐅᒄ ᐙᔥ ᐊᓐ ᑖᐹ ᓂᐦᑖ ᐅᐦᒋ ᒌ ᐙᔪᒋᐦᑖᑭᓂᐤ ᑮᑆ᙮ ᐋᐅᒄ ᐊᓐ ᑳ ᒌ ᐅᐙᓂᐦᑖᑭᓂᐎᒡ᙮ ᐊᓐ ᒫᒃ ᐐᐦ ᐄᔨᔨᒦᒋᒻ ᑮᑆ, ᐋᐅᒄ ᐙᔥ ᒨᔥ ᑳ ᐃᔮᑭᓂᐎᒡ᙮

ᑖᔑᐱᑖᑭᓐᐦ ᑳ ᒌ ᐅᔑᐦᑖᑭᓂᐎᒡᐦ, ᐋᑯᑦ ᑳ ᒌ ᒥᔥᑭᐎᑎᐦᑖᑭᓂᐎᒡ ᒑᒀᓐ ᐋ ᐱᐳᐦᒡ᙮ ᐋᔔᑭᓐ ᑭᔮ ᑳ ᒌ ᐅᔑᐦᑖᑭᓂᐎᒡ᙮ ᐋᑯᑦ ᑳ ᒌ ᐃᑐᑎᐦᐋᒡ ᐊᐙᓂᒌ ᐅᓂᒫᓯᒥᐙᐤᐦ᙮ ᓂᒫᔅ ᐙᔥ ᐋᐅᒄ ᓈᔥᒡ ᑳ ᐱᒫᒋᐦᐄᐙᑦ ᒨᔥ ᒌ ᐃᓈᓂᐤ᙮ ᒨᔥ ᑮᑆ ᐋ ᒌ ᐙᔪᑎᓰᑦ ᐊᓂᑦ ᑮᑆ ᐋ ᒌ ᐊᑎ ᐃᐦᑖᔮᐦᒡ᙮ ᐋᐅᒄ ᐊᓐ ᑳ ᒌ ᐃᐦᑎᔮᐦᒡ ᓅᐦᑖᐐ ᐋ ᐐᒑᐅᒄ ᐋ ᓅᑎᒫᓵᑦ ᑭᔮ ᐋ ᓂᑐᐙᐦᒋᒀᑦ᙮

 

Share Button

Comments are closed.