ᓅᐦᑖᐐ
ᐃᓛᐃᓵ ᐌᑉ ᐋ ᒌ ᑎᐹᒋᒧᑦ
ᐱᕌᔨᓐ ᐌᑉ ᐋ ᒌ ᐃᑣᔥᑎᒫᑎᐦᒃ ᑭᔮ ᐋ ᒌ ᒥᓯᓂᐦᐊᐦᒃ
ᐋᔪᐎᒄ ᑮᑆ ᒥᒄ ᐊᓂᔮ ᑳ ᐹᐦᑎᒧᒡ ᐊᓂᔮ ᓅᐦᑖᐐ, ᐊᓂᑖ ᑮᑆ ᐋ ᑎᒀᒑᔨᐦᑖᑯᓂᔨᒡ, ᐅᔥᑭᒡ ᐋ ᐊᑎ ᒥᒥᔥᑭᐎᑎᐦᒡ ᐊᓂᑖ᙮ ᑳ ᒌ ᐃᐦᑎᓈᓂᐎᒡ ᐙᔥ ᐊᓂᑖ ᐋ ᐅᒋᒀᒋᒑᓂᐎᒡ ᐊᓂᑖ, ᐊᓐ ᑮᑆ ᓰᐲ ᐋ ᒌ ᐃᐦᑖᔮᐦᒡ᙮ ᓈᔥᒡ ᐙᔥ ᐋ ᒌ ᐅᒋᒀᓱᒡ ᓂᒫᓯᒡ, ᒫᓯᒫᑯᓯᒡ ᒀ᙮ ᑭᔮ ᐊᓂᑖ ᑯᑎᑭᒡ ᐊᐙᓂᒌ, ᐄᔨᔨᐅᒡ ᒀ, ᐋᑯᑖ ᑳ ᒌ ᐹᒋ ᐃᔅᐱᔨᒡ ᐊᓂᑖ ᐊᑎᒽᐦ ᐋ ᐋᐱᒋᐦᐋᒡ, ᐋ ᐹᒋ ᐅᒋᒀᒋᒑᒡ ᐊᓂᑦ ᒀ ᓰᐲᐦᒡ᙮ ᐊᓐ ᐋ ᓈᑣᔮᔑᒡ, ᑭᔮ ᐊᓂᑖ ᐄᔑ ᓃᐦᑖᒋᐎᓐ᙮ ᐋᑯᑖ ᐊᓂᑖ ᓈᔥᒡ ᑳ ᒌ ᐅᒋᒀᑖᓂᐎᒡ ᐅᔥᑭᒡ ᐋ ᐊᑎ ᒥᔥᑭᐎᑎᐦᒡ ᑭᔮ ᐊᓐ ᐋ ᐊᑎ ᔮᔮᐅᐙᔅᑭᑎᐦᒡᐦ ᑮᑆ᙮ ᑭᔮ ᒫᒃ ᓂᔮᓂᑯᑐᓐᐦ ᑳ ᒌ ᐃᐦᒡ ᒀ, ᐋ ᑭᔅᑭᒫᔅᑭᑎᐦᒡ ᐊᓐ ᒀ ᓰᐲ᙮ ᐋᑳ ᓈᔥᒡ ᓅᑯᐦᒡ ᐊᓂᑦ ᒀ ᐋ ᒫᔮᑎᐦᒡ᙮
ᐋᔪᐎᒄ ᒫᒃ ᐊᓂᔮ ᐹᔨᒀᐤ ᑳ ᐃᐦᑎᒡ ᐊᓂᔮ ᓅᐦᑖᐐ, ᓂᑳᐐ᙮ ᐊᓂᔮᐦ ᑖᓂᔨᓪ ᓯᓅᑆᐃᐦ, ᐋᐅᔨᒋᒑᓂᐦᐄ ᑳ ᐐᒑᐙᒡ᙮ ᐋᔥᒄ ᒌ ᐊᐙᔑᔒᐅᔨᒋᒑᓂᐦᐄ ᒀ᙮ ᑳ ᐅᒋᒀᒋᒑᒡ, ᑳ ᓂᑑ-ᐅᒋᒀᒋᒑᒡ᙮ ᐊᑎᒽᐦ ᑮᑆ ᒌ ᐋᐱᒋᐦᐋᒋᒑᓂᒌ᙮ ᑖᐹ ᒀ ᓂᐅᐦᒋ ᐐᒑᐙᐅᒡ᙮ ᑭᔮ ᑖᐹ ᐋᔥᒄ ᓈᔥᒡ ᓂᐅᐦᒋ ᑭᒑᔅᒋᓐ ᑮᑆ ᒑᒀᓐ, ᐋᐅᒄ ᐊᓐ᙮ ᐋᔪᐎᒄ ᐊᓂᔮ᙮ ᒥᒄ ᒀ ᑳ ᐹᐦᑎᒫᓐ ᑳ ᑎᐹᒋᒫᑭᓂᐎᑦ ᐋᐅᒄ ᐊᓂᔮ ᓅᐦᑖᐐ, ᑳ ᑣᔑᓂᑯᐱᓈ ᐊᓂᔮ ᑳ ᐅᒋᒀᒋᒑᒡ᙮
ᐊᑳᒥᐦᒡ ᓈᑖ ᒌ ᑣᐦᐅᔨᒋᒑᓂᐦᐄ ᐱᔮᐤᐦ᙮ ᐅᐹᔅᒋᑭᓐ ᑮᑆ ᒥᒄ ᐋ ᑎᐦᑯᓂᐦᒃ᙮ ᒥᒄ ᐊᓂᑖ ᒌ ᐐᐦ ᐄᔑ ᒋᔅᑭᒥᔅᑯᒋᒑ᙮ ᐋᔪᐎᒄ ᒫᒃ ᐊᓂᔮ ᒌ ᑣᔑᓂᐎᒋᒑ᙮ ᓈᑖ ᑮᑆ ᒋᐦᒋᐙ ᒌ ᐄᔑ ᑣᔑᓂᐎᒋᒑ, ᐊᓂᔮ ᒀ ᐅᐹᔅᒋᑭᓐ ᐋ ᑎᐦᑯᓂᐦᒃ᙮ ᒌ ᐱᒋᔅᑎᓂᒧᒋᒑ ᐊᓂᔮ ᐅᐹᔅᒋᑭᓐ᙮ ᐊᓂᑖ ᑰᓂᐲ ᒌ ᒥᓯᒋᐦᑏᒋᒑ ᐊᓂᑖ ᐄᑖᒥᐦᒡ, ᒑᔑᐙᑦ ᐊᓂᔮ ᒀ ᐋᑳ ᒋᐦᒋᐙ ᐊᓂᑖ ᐅᐦᒋ ᐃᔅᐱᔨᑦ᙮
ᐋᒄ ᐅᔮᐦ ᑮᑆ ᐅᐙᒑᐙᑭᓂᐙᐤᐦ, ᑯᔮᐦ ᑖᓂᔨᓪᐦ, ᐋᔥᒄ ᐙᔥ ᒌ ᐊᐙᔑᔒᐅᔨᒋᒑᓂᐦᐄ ᒀ᙮ ᓈᔥᒡ ᐋ ᐃᑣᑦ ᐋ ᒫᑐᑦ, ᐃᑖᐤ ᐊᓂᔮ ᓂᑳᐐ᙮ ᓂᑳᐐ ᑮᑆ ᑳ ᐱᑯᐦᐙᑦ ᐊᓂᔮᐦ ᓅᐦᑖᐐᐦ᙮ ᑖᐹ ᓂᒋᔅᒑᔨᒫᐤ ᐲᔖᑭᓈᐲᐦ ᑳ ᐙᐱᓂᒧᐙᒀ᙮ ᐋᑎᐐ ᒫᒃ ᑳ ᐱᑯᐦᐙᑦ ᑮᑆ᙮
ᐋᒄ ᐊᓂᔮ ᒫᒃ ᑳ ᐹᒋ ᓃᐳᐎᑦ ᐊᓂᑦ ᐋᐃᐦᒡ ᐃᑖᐤ ᐊᓂᔮᐦ ᓅᐦᑖᐐᐦ, ᐊᓂᔮ ᑮᑆ ᑳ ᐃᒀᓯᐱᑖᑦ ᒀ᙮ ᑳ ᐹᒋ ᓃᐳᐎᑦ ᐊᓂᑦ ᒥᔅᑯᒦᐦ ᐋ ᒥᔅᑭᐎᓯᔨᒡᐦ᙮ ᑏᐙᐦᒡ ᐊᓂᑖ ᒦᓐ ᐄᔑ ᒌᐙᑳᐴ᙮ ᒦᓐ ᐋᑯᑖ ᐋ ᐄᔑ ᒋᔅᑐᐦᑖᑦ᙮ ᓈᑐᐙᐱᐦᑎᒃ ᐊᓂᔮ ᐅᐹᔅᒋᑭᓐ, ᐃᑖᐤ᙮ ᐊᓂᑖ ᑰᓂᐲᐦᒡ ᒌ ᐃᐦᑎᑯᓂᔨᒋᒑ᙮ ᒌ ᐙᐱᐦᑎᒧᒋᒑ ᐊᓂᔮ ᐅᐹᔅᒋᑭᓐ᙮ ᐋᑯᑦ ᑳ ᐅᐦᒋ ᐅᑎᓂᐦᒃ ᐊᓂᔮ ᐅᐹᔅᒋᑭᓐ᙮
ᒀᑖᑦ ᐊᓂᔮ ᑰᐦᑯᒻ, ᓈᔥᒡ ᐋ ᒌ ᒥᒑᔨᒥᒃ, ᐃᑖᐤ᙮ ᑏᐙᐦᒡ ᒦᓐ ᐊᓂᑖ ᑳ ᐄᔑ ᒋᔅᑐᐦᑖᑦ, ᐊᓂᑖ ᐊᓂᔮ ᐋ ᒌ ᐅᐦᒋ ᐊᒀᓯᐱᑎᒃ, ᐃᑖᐤ᙮ ᐋᒄ ᐆ ᑖᓕᔪᓐ, ᓈᔥᒡ ᐋ ᐃᑣᑦ ᐋ ᒫᑐᑦ, ᐃᑖᐤ᙮ ᒌ ᐃᑖᔨᒫᒋᒑ ᒀ ᒋᐦᒋᐙ ᒑ ᐱᑭᔥᑎᐙᐱᔨᔨᒡᐦ᙮ ᒑ ᐃᑖᒋᒫᑭᓂᐤ ᐊᓂᔮ ᓅᐦᑖᐐ᙮
ᐋᔪᐎᒄ ᒫᒃ ᐊᓂᔮ ᑳ ᐹᒋ ᒌᐙᐱᔨᒡ᙮ ᒌ ᐹᒋ ᒌᐙᐱᔨᒋᒑᓂᒌ ᒀ ᑏᐙᐦᒡ᙮ ᐋᑯᑦ ᒫᒃ ᒌ ᐅᐦᒋ ᑭᒑᔅᒑᔨᒫᑭᓂᐎᒡ ᐊᓂᔮ ᑳ ᐃᐦᑎᒡ; ᑳ ᑣᔑᐦᒃ ᓅᐦᑖᐐ ᑳ ᐐᐦ ᓈᑖᑦ ᐱᔮᐤᐦ ᐊᓂᑖ ᐊᑳᒥᐦᒡ᙮